PUISI MADURA MOH. TOYU (1)

CALEMOT SONAR

Padhana jajjalang nemmo tera’
Sonar se nabuy dhari ate bungka
Perak alangngoy maske pas mate,
Loppa ka pate dhari agebbuna
Taresna ban pon nyaker


Jajjalang sajan ajejjel
Ngejjel abugel mentel sadaja peggel
E dhalemma badha poja
Damar apangrasa ta’ perna andhi’ tera’
Bila eerrep sonarra sajan pasda

Pangapos, 16-Reyaja-1429


ANEKO’ BULA TARETAN

Gunna
Patot araop Yusup
Patot e ola’e lebbi dhari Ayyub
Patot andhap asor padhana Mohammad

Mon gantheng ja’ olok Yusup
Mon sabbar ja’ olok Ayyub
Mon lemmes ja’ olok Mohammad

Cokop bula olok keban abaluduran
Awosengngan todhusan
Baringus atangesan
Santre akole’ macan
Ma’ ta’ semma’ setan
Maleng akole’ pate’
Asango sakone’sela kene’
Musafir akalambi olar
Ataretan akole’ baja
Ma’ ta’sake’ etobi’ tatangga


TAPENGSOR 2

Ataresna sataretan akantha mothak
Sabban are dujan azakat

Sapa terro odhi’ ta’ nyaman
Sakeng bula ta’ akalakowan
Coma araja sogina Pangeran

Ja’ loppa taretan
Sabab bali’ olok keban
Etembang ethok* ta’ paraban

Nem Bara’, 1430
*Stempel


TAPENGSOR 1

Bila katagiyan
Nyaba ekatarowan
Ta’ arassa esengnga’ nyarowan
Mangka manesan

Bigina accem sabellun mesem

28-Rejjeb-1429


SAOR

seyang alandhu’
malem nundhu’

“Hey
Napso se nyalam
Jaga!
Pongpong gi’ ta’ takethas
Maso’ ka taman naraka dunnya
Lagguna alako gabay ta’ kalaban panemor

Enga’!
Are se tadha’ kaju
Sanonto asadhiya pajung
Bingung lagguna burung
Mon dika ta’ ngakan!
Sothok labangnga sowarga!

Gappora, 17 Powasa 1429

Post a Comment

Lebih baru Lebih lama