Sesaat lagi, situs dialihkan ke
http://www.lontarmadura.com
_______________

Puisi Madura Istiqomah

31 Des 2010
  

LEBUNNA WALI

Kompolan para wali ta’ katemmo
Kanyamanan se earep bula
Para santre ta’ ekaedhing
Tabbuwan taresna se kacepta

E manarana, ta’ tabaca
Sonarra se nembang
Dhalem taresna buku ta’ kaabas
Lalampang panabar loka

Bula ban dika dhari dhuwa’ akkal
Daddi pajai’na
Dhalem lebunna para wali
Jugan lebunna

Cangkreng, 1 Mei 2010




PORAK SOCA

Lebur onggu okerenna socana dika
Abassagi, bula tabalaccar
Adu’a ma’ le se esake’e socana dika
Tettep bula

Ampon acerceran taresna bula
Kantos kabendheran sanonto coma bula
Akadiya alhaj lamba’ abessa egentong
Karana ngoca’ “ana Al-haq”

Andhi’ pekkeranna dika
Ngobbar ate bula
Ompama sanonto buwana bibir bula kadaddi
Asmana bula dika jugan ewahyuwagi

Ampon esebbit eporak
Kalambi atambel pajagana teggal
Kalaban etemmowa jalan se bakal bula angguy

Abassagi, taseksa bula
Kalaban khotba bucco’ ban baruy
Adhimma dika, salametagi bula
Edhingagi…! O… pamabu’

Cangkreng, 1 Mei 2010




TANG JUBA

Kerrong se banget ka’angguy neggu’
Sagellas anggur dhari tanangnga dika
Kalaban pasera cem-macemma rahasia
Egiba’a dha’emma sossa ban serrona

Bula pasra odhi’ dhalem areppan
Kaangguy ngabas ropana panglepor
Bula akadiya nang-konang
Bula akadiya sabuter bigi se taobbar

Juba reya tepowan, lecek malolo
Sadaja reya jugan possa’ kapalsuan
Ba’ kowasa’a ngonjan aba’
Teppa’ e adha’na labang

Bila panglepor dari sagellas pangesto
Pada ka jungjung neser
Tanto rohna dhalem juba odi’na bula
Kalaban opana kasennengngan

Bula seppo makkea bisa jugan ngoda
Cepceppa manessa dika
Ma’ le dhari se kene’
Bula bisa adaddiyagi alam sajagad taonjan.

Cangkreng, 1 Mei 2010


 
Istiqomah, lahir e disa Cangkreng, Lenteng, Songennep, 03 Maret 1990. Mahasiswa Sekolah Tinggi Ilmu Tarbiyah Aqidah Usymuni (STITA) Songennep panera, salaen nyerrat puisi juga nyerrat careta. Tolesannepon oneng emuat neng e Radar Madura (Jawa Pos Group), majalah Tantri, tabloid Memorandum tor maso’ dhalem antologi Lanceng Paraban Ganja (Komunitas PELAR, 2010). Aktif neng e UKM. Komunitas PELAR STITA Songennep molae taon 2008.

1 Pamanggi:

elhadiry mengatakan...

Wah, sep puisina. Enga' reya malarat oreng se peduli. Salut untuk Istiqamah.

Posting Komentar

Diberdayakan oleh Blogger.