Sesaat lagi, situs dialihkan ke
http://www.lontarmadura.com
_______________

Jhuko’ Kanglengnga Se Bhaghus Bhuddina

29 Jan 2011
Bhuju’ Langghar iya areya settong oreng partapa sakte se’ asalla dari Polo Bhabian, eya areya settong polo se dhunongnga neng e tengnga Tase’ Jhaba. Salerana atapa e Katapang, settong kennengngan e Polo Madhura se sangat jhau dari tana kabhabharanna. Reng-oreng se bada e Katapang jadiya sanget ngormadhi tor ngasambu’ kasakteanna Bhuju’ Langghar.
Bhuju’ Langghar reya ghadhuan katetean sandal ajaib se ekaghabay dari kaju. Bila sandal jareya eangghuy salerana bisa alomampa e attas aeng saghara, alelana dari polo da’ polo, ta’ kalaban ghadhuan rassa tako’ tasellem imma taseret aros omba’, saghara parsasat settong tana daradhan se alos tor rata.
Bhuju’ Langghar serreng ghubhar da’ Polo Bhabian kaangghuy ngoladhi tana pabhabharanna. Biyasana salerana bada neng e Bhabian coma barampan are bhai, ban bila rassa kerrongnga da’ Bhabian jadiya la eangghep cokop, salerana abali pole da’ kennengngan partapanna e Katapang. Antara Bhabian da’ Katapang cokop tambhan. Anangeng margha sandhal ajaibbha ghella’, mangka tambhanna antara Bhabian so Ketapang jareya ekarassa dhaddhi cokop semma’.
E naleka settong are, neng dalem parjhalananna ghubhar da’ Ketapang, Bhuju’ Langghar taghaliccer sarta sandal kaju ajaibbha ngantol ekalanyo’ omba’ raja. Margha ta’kalaban ngaghem sandal ajaib kasebbhut, salerana pas ta’ bisa pole ajhalan e atassa aeng saghara. Kalaban karena kakowadhan se ghi’ eghadhui, Bhuju’ Langghar alangngoy sopaja ta’ tasellem. Naleka kakowadhanna para’ tada’a tor salerana magghis tasellemma, o-tao pas bada settong jhuko’ dateng nolonge Bhuju’ Langghar esongghuy eaterraghi kantos nandhuk da’ tengghengan kalaban salamet.
Bhuju’ Langghar aromasa sanget kaso’on da’ jhuko’ se becce’ ate se ella nolong salerana dari bhabhajana aeng saghara. Sabagi settong oreng partapa se arif, salerana ajhanjhi jha’ otang bhuddhi kodhu ebales kalaban bhuddhi, ban otang kabhaghusan kodhu ebajar kalaban kabhaghusan keya. Bhuju’ Langghar lajhu makompol sakabbhinna margha Ketapang sarta nyaretaaghi hal kedhadhiyan se la ealame se enempa da’ salerana. Bariya:
“Settong jhuko’ sakte la nyalamettaghi sengko’ dari papaten. Jhuko’ kasebbhut akanta se tao da’ bhabhaje se ngandam da sengko’. Dhibi’na nyemma’e sengko naleka sengko’ magghis tasellemma. Dhibi’na nabarraghi bugghiggha. Ane sanget. Bugghik jhuko’ jareya akanta katedungan se’ bada kasor lembu’na. Sengko; lajhu asongghuy ebugghigha jhuko’ jareya. E dalem bakto se ta’ sabarampa abiddha sengko’ se esogghuy la epanandhuk da’ paseser Katapang kalaban salamet. Saellana bariya jhuko’ sakte kasebbhut lajhu terros abali da’ saghara pole. Naleka jareya sengko’ ghi’ bellun sempat ngocappaghi rassa kaso’on. Dhibi’na ella aberri bhuddhi bhaghus da’ sengko’ se’ kalaban ta’ kabilang arghana. Bhuddhi kodhu ebales kalaban bhuddhi. Kabhaghusan kodhu ebales kalaban kabhaghusan. Parmelana sengko; nyo’on da’ para margha Katapang dinna’, sopaja’a ajjha’ sampe mate’e imma ngakan jhuko’ semacemma jhuko’ se nolong sengko’. Jhuko’ kasebbhut aropaaghi jhuko’ karamat!”. Bariya parnyataanna Bhuju’ Langghar da’ sakabbhinna margha Katapang.
Margha Katapang jhughan aromasa ce’ kaso’onna da’ jhuko’ se bhaghus bhuddhi se ella nyalamettaghi saseppona se sanget etaresnae sarta ehormate jareya. Jhuko’ kasebbhut aherra eberri’ nyama Kanglengnga. Sampe’ sateya para margha Katapang ta’ bangal mate’e sarta ngakan jhuko’ Kanglengnga jareya, amargha jhuko’ kasebbhut ella andi’ jasa nyalamettaghi oreng seppo se sanget etaresnae sakabbhinna margha Katapang iya areya Bhuju’ Langghar. (ta' kasebbut se ngarang)

0 Pamanggi:

Posting Komentar

Diberdayakan oleh Blogger.