Sesaat lagi, situs dialihkan ke
http://www.lontarmadura.com
_______________

Puisi Madura KA. Latief

15 Agt 2011


Arokat Roma

Arokat jasag neng pengirra perreng
Matenggi canggana roma
Se ebatesse paregi
Antarana ngonjur, sela, napang, agentang
Tor agulimpang sakowat ora’

E kangan kacerra mata
Binis-binis tombu mabiru
Mongsar asangle’ lapar
Nyembu pelka’ ka manessa aeng powan,
Ka lemma’na Sora Sappar

;Jarna’ karena’an

Pangrasa

Sorem panengal bunten cegga
Alangngoye tase’
Sabab, romasa se nyata
Enggi sangka se malorek pangrasa


Alomampa

Saamponnan terbi’ pangara
Nyara alomampa
Ebuwan malaekat nabur rahmat
Kaangguy ekaenga’ sasat

  
Rengsa

Arte ta’ etemmo dhalem mempe
Bin-sabin eporak duwa
Esamsam owa’ mennyan
Ta’ kalendhi kaangguy maberse soko
Dhari petteng cellot se calemot

Olay peyas mowa banne pangalang
Ajalane kobasa-Na
Namong nafso ta’ kengeng nyorot
alaban rassa


Marokta

Salera-salera makerrep Tanya
Akal marokta samolena dhari bujuk
Paeng buko calaka,
Jurang lobang daraka
Bara’ temor dhaja lao’
Asabung mapecca attas, baba,
Penggir, tengga, konco’, bungkel,
Nyongkel kerres aoker ketter
  

Raka’at Kowak

Loka se aramo’ nalar
Nokduk ka roso’-roso’ saeket taon abidda
Loppa ka ra-ara
Ondhem nyalapsap abundu’ mata
Janor nang neng nong akalenong
Eserrop angen
Tahajjud nompa banjir agalir ka talaga
Apoy asaloy dhalem raka’at
se ekabidi kalaban kowak

  
Pelar Aeng Mata

salerana akalemba’ noro’ omba’
alengleng lebat Tolareng
apekker kaper saeng laseng
ngoker taker
macco pada ebu
merres aeng mata sowarga
tor nator totor maddu dunnya
marga lempo
marantas baluntas, korpas
dhalem poji, pelar ngalarkar
bulan katar…



Makhsyar Kananga

enggala dhapa’ nemor kara
serame makam-makam kalaban babur
laggu’ kenneng gabay sango
nojju kaodhi’an se langkong bajra
ro’om kananga tor sakebbun du’a
samoga mejejjer lajar
samoga malanjang omor
jugan aeng tapa dhalem dhadha
nyamsam sagara se apedderri jagat
maentas sadaja pongsa
maraja gilina poji
malandhay samakhsyar sowara
dhari sowarga se jemjem
jumenneng dhalem bume


Maca Cangcala

sabban anaonge saalas roba
dhari kattha-kattha sokma
se akoja ngalenglenge are
e seddi’na gunong
malathe potena ate,
mabar merana dhadha
salaggi’ roma atahiyyadi ka’bah
ales memba sandhakebbi nyaba
langlang duka Guste
alalare aksara-aksara sagara
se ngasowar magumigil bulan
ngeja cangcala
ngeja sasaka
ngeja tana


Araja Karteka

Pan-sapan sosop ka tolang-tolang
ka gerrungan
sapasang sape lottrengan
akenca’ e taneyan
dika asorak amramme songay pangarep
e leca’na geddhung se jebbu,
e kalarkar tambikar
rato-rato araja karteka
mardika! Ngerrap pangocap
ka ponca-poncana samper
e lemma’ tangguli nyapcap
asambay noro’ ojan
noro’ sonarra damar se nalpe’
rekka’ e tabing
nekkane socce


KA. Latief, rembi’ e Songennep, 10 Oktober 1992. Oneng aktip neng e Sanggar Andalas Annuqayah Lu’-Gulu’ (2007-2009), Komunitas Kobhung Gappora Temor, Gappora, Songennep (2008 kantos samangken) tor nyeppowe Komunitas Perigi Budaya (KoPYa) Dungke’, Songennep. Puisi-puisi anggidannepon takompol dhalem antologi Izinkanlah Kurajam Cinta Dengan Puisi (BUKU-IJO, 2008) tor antologi sareng ca-kanca Komunitas Kobhung Merangkum Langit Oktober  (BILIK PUSTAKA, 2010). Salaen nyerrat puisi, jugan ragap ateater.

0 Pamanggi:

Posting Komentar

Diberdayakan oleh Blogger.