Sesaat lagi, situs dialihkan ke
http://www.lontarmadura.com
_______________

Puisi Madura Imam Ekapuji Al-Ghazali

26 Sep 2011

LENONG

Saba-saba neko
Sakse agilina songay aeng mata
Derres akantha ojan mosem nembara’
Lenong-malenong taresna ban kerrongnga ate,
Ngereng sabban dargugga nyaba
                                                Se serret.
Dha’ robana dika ale’ se takelbut jaman, tana kobi, dhingdhing are bato kombung, ban paesan kaju nangka.
Ta’ nyangka
Taresna ate bula
            Gi’ lenong
Jajarbaan malathe ro’om e taman.

Baraji, 2010



MANGLE

(: neka baktona nyalamangsa. pasera se ngajarana kaula
 : manggu somela, masang andhung, masang  pelte’, ban raet pangonong baja laggu?
E saamponna sedana eppa’)

Nagara nemor
Dhaun-dhaun gujur adina ronce’
Songay kerreng, sagara asat
E samarena barujunna kathel
Asabbhu’ mangle. Ban apandhi ro’om babur

Dhu guste
Abdina are’ dummol ta’ aguna e tanang
Tataneng se dhi-budhi
Ban pate’ toan
Potong
Ajajagana, mempe sowarga se kaloppae.
Langnge’ rempa’
Bume sebbak, banjir.
Badan: kan’an
            Akalaong nyare gunong
            Nekkesana orep se para’ nyalep

Topote, 2011



LANGNGE’ NANGES, BUME ABATHOK

Saabidde 20 taon
Alam takepe’ badan
Otaba badan se takepe’ alam
Ta’ sakaleyan dhadhabun “pangeran” nyata e mata
Kembang ro’om pepeseman kana’
Agundhung
                        Akalotor
                                                Akerrengan.
Romana se daba’ terep e serrep tana, bato cor pamarenta.
Dhara aeng mata nompa
a galijir
malandhu binis parpadun taretan sadhara

lantaran angka se ta’ mare gan sapolo
bume Sidoarjo abathok lanjang,
gunong buja gujur,
sunami dhang-ngendhang ka paseser-paseser.
Apangrasa
Ate ketter, otek ta’ bisa apekker
Bila sanonto
Are, lakar pon aher

Pangarangan, 2011



SATO’OR MALATHE

E seyang se para’ malem
Roma lendhu
Gella’ bunga se ta’ lajak
“dhari angka dhuwa’ gella’ nyagara”
Mabanjir pello bula
Sampe’ mangennes rassa ate
Apesa ban kanca
Arassa gi’ korang bula ngaloskos saseba’ are

Tape oca’na dika ngapose
Cokop sampe’ dhinto, bula ban dika pon padha eator bakto
Maddha mole
Mole, nojju garis mangrib.

Topote, 2011



OJAN, PANCONG BESSE

Anape ma’ derres ojan bulan nonto?
E tengnga gartangnga are bubukon pancong besse

Ojan mabacca: obu’, pepe, bibir ban ate

Dhuh, ma’ mara neko mosem baja nonto; ta’ tanto

Padha ban gulina rengsa
Abugel e dhadha

Topote, 15-Sep -2011


Imam Ekapuji Al-Ghazali, rembi’ e Songennep, lerressepon e kampong Pondhuk Lao’ disa To Pote, kacamadan To Pote. Mangken gi’ nyare elmo e Sekolah Tinggi Islam Al Karimiyyah (STIA) Baraji, Gappora, Songennep. Nyeppowe Forum Kajian Seni dan Budaya Komonitas  Rakyat Taresna, neng e Baraji, Gappora. Salaen noles neng e media, tolesannepon se aropa puisi juga takompol dhalem antologi sareng ca-kanca Hijrah (2010).




0 Pamanggi:

Posting Komentar

Diberdayakan oleh Blogger.