Buju` Juruwan

Lukman Haklim AG

Buju` Juruwan aropa`agi settong nyamana asta (makam) se badha e disa Juruwan Dhaja kacamadan Topote (Batu Putih). Juruwan Dhaja badha e korang-lebbi 20 km dhari kottha Songennep. Anyama Buju` Juruwan sabab buju` ka`dhinto badha e disa Juruwan.

Buju` Se badha e kampong Jura` se korang lebbi 5 km dhari kantor kacamadan Topote enggi ka` dhinto asta otaba pasareyannepon Raden Fatah. Raden Fatah odhi` nyebbarragi agama Islam e Songennep ra-kera abad kapeng 15. Asma`epon aslina Pangeran Siding Margo`. Nangeng, lebbi kalonta kalaban sambadan Raden Fatah.

Ainul Anwar kalaban  tolesannepon se abul-ombul “Buju` Juruwan, Antara Mitoa dan Bukti Sejarah” (Tabloid Info,edisi 7. 18 Pebruari 2008) nyabbuddagi ja` Raden Fatah ka`dhinto kompoyyepon Sunan Kudus dhari pottraepon, Pangeran Pakaos. Pangeran Pakaos ngagunge pottra Syekh Ahmad Baidlawi tor Pangeran Siding Margo` (Raden Fatah) ka`dhinto. Daddi, Raden Fatah aropa`agi ale`epon Syekh Ahmad Baidlawi se se kasohor kalaban sambadan Pangeran Katandur. Kasambat Pangeran Katandur karana pasareyanna badha e kampong Katandur disa Bangkal kacamadan kottha Songennep. Menorot penotorrepon pajagana Buju` Juruwan, H. Muhammad Ahya`,  se etoles sareng Anwar nyebbudagi ja` Raden Fatah seda ra-kera e taon 1470-an.

Saongguna Raden Fatah banne oreng asli Madura. Nangeng, oreng manca  se rabuwepon dhari Jaba Tengga (Jawa Tengah). Raden Fatah seda naleka atapa e Guwa Patapa`an. Guwa Patapa`an badha neng 150 m mongging temor dhari Buju` Juruwan. Neng guwa ka`dhinto Raden Fatah se adinggal dunnya.

Salaen dhari ka`dhinto, e sabban taonna, lerressepon sabban are Juma`at manes e Bulan Rebba (Sya`ban) abadha`agi salameddan. Salameddan ka`dhinto anyama Lolobaran. Lolobaran dhari oca` “lebar” aoba daddi  oca` rangkep adha` tor panoteng “an” daddi lolobaran se agandhu` arte “lebbar, pona berse”. Se emaksod dhari oca` ka`dhinto enggi paneka lebbar, lobar dusana. Dhalem acara ka`dhinto biyasa`epon eesse`e kalaban hataman Al-qur`an sareng maos barzanji otaba solawadan dha` Kanjeng Nabbi Muhammad.

Bila ampon dhapa` baktona Lolobaran, magarsare sakobengngepon Buju` Juruwan padha atong-rotong ajung-rojung kalaban ragap padha adhatengngan nujjune dha` buju` ka`dhinto. Magarsare se adhatengngan ka`dhinto ta` ambu soro ta` ambu ajak, adhatengngan dibi`. Lebbi dhari gapaneka, oreng se dhateng dhari Podhay tor en-laenna.

E are-are laenna, salaen dhalem salameddan Lolobaran jugan badha oreng se dhateng ka buju` ka`dhinto kaangguy aziyarah otaba atahlih, ngaji. Contowepon reng-oreng dhari manca.