Puisi Madura En Kurliadi Nf

En Kurliadi Nf otaba se gadhuwan nyama asli Kurliadi paneka laher e Polo Gili Genteng, Songennep. Alumni Pondhuk Mathali’ul Anwar Pangarangan, Songennep paneka nyerrat dhalem basa Madura tor basa Indonesia. Sareng ca-kancaepon, puisi takompol dhalem antologi Nemor Kara (BBS, 2006) tor Nyanyian Langit (Sanggar Ababil, 2006).

Ka Camara Odhang Taresnana Bula Tasongkor

E sodha' pornama gar temor
ro'om galuyya paessa pendhangnga mesemma dika
Macolpa' jail se agili e congor pao ngodha

Sambi matappor polka' matana dika
nyomber dari salokana ate
Mancar garis camara odhang se ngabiru
E berruyya mowara karang se atalebbur
E aros gadebbung gaddhang
Se buwana nyelbi' e sokmana bula

Dhuh..ale'
Taresnana bula tasongkor
Loka se anganga akantha merana kasta
ta' atabbus gula mera
Se manes akantha bibirra dika

tore ale' bula,__
pa'-rampa' kakonengan
Nemmo sello' elang pole
Ngarammes ka dangkana robana are
Se ta' ngoncar dhari bauna badanna dika

cong-koncong konce
Koncena lo'-olowan sabiteng
Sajanor janorra jut anjudan
Ta' sambal komel komella' komaddam
Sapa mella maddam..,_

Ka ranca’na lessong pepena dika
Se cekkong akantha tase' se asesse'...

Legung - Songennep, 2011