E jhaman lamba’ neng e tana Jhaba bada settong karajaan. Ratona a’asma Raja Ghilingwesi. Salerana ghadhuan settong Pottre se ropana sanget raddhin tada’ madhane. Anena, pottre Rato kasebbhut o-tao etemmo ababerre’. Mangka pottre jareya ghi bellun andi’ raka. Sajan abit padha’aranna Pottre jareya katon sajan atamba raja, nangeng Sang Rato ghi’ bellun pareksa jha’ apa se kadhadhiyan mongghu da’ Pottrena. Keyae Poleng, papate e karajaan jadiya pareksa da’ hal kadhadhian se nempa da’ Pottre Rato jareya. Molana, sasorop kalaban kawajibhanna sabagi Pate, Keyae Poleng alaporraghi bhab apa se epareksane jareya da’ Sang Rato.
Mereng laporanna Keyae Poleng jareya mangka Sang Rato ce’ takerjhaddha, tacengnga’ acampor malo. Molana, Sang Rato lajhu nembhali Pottrena sopaja ngadhep da’ Rato, ghuna mondhut pareksa parso’alan se sanyatana. Salerana rassa dhuka acampor curiga Sang Rato adhikane da’ Pottrena, jha’ sapa saongghuna reng lake’ se’ sampe’ bangal apartengka nyoreng paraobhanna Sang Rato. La tanto bhai Pottrena ta’ bisa ngatore katerrangan se sabhenderra, amargha salerana ta’ tao azina bi’ oreng lake’ se kemma’a bhai, jhughan ta’ oneng persis jha’ apa se sabhenderra se kadhaddhian ngennenge da’ salerana. Tos-kantos, kalaban parasaan ce’ tako’na Sang Pottre asopata kalamon salerana ongghu-ongghu ta’ ngalakone zina.
Kaangghuy ajaga sopaja parbhaba Sang Rato ta’ elang, mangka pate Keyae Poleng mator da’ Rato, sopaja Sang Pottre ebuwang da’ kennengngan se jhau. Tape Sang Rato ta’ sarojhu’. Rato mala ngotos da’ Pate sopaja Sang Pottre esedhane bhai ngangghuy peddhangnga, amargha ghaghandhu’an jareya sanget mamaloaghi. Mongghu da’ Sang Rato, rasa malo ta’ bisa enilay imma eporop kalaban buddhi otaba bharang.
Kalaban pangghaliyan se ce’ berra’na, Sang Pate nyarojhu’i karsana Rato. Akherra Pate lajhu abhakta Sang Pottre da’ paseser. Naleka e dalem parjhalanan nojjhu paseser jareya, Pate Keyae Poleng ajellassaghi jha’ arapa ma’ Sang pottre eghiba da’ kennengngan e paseser. Sang Pottre manyerra pasra da’ kapotosan, sarta ngatore Sang Pate nyedhane salerana. Nangeng Sang Pate ta’ tegha mate’e oreng se’ ta’ andi’ sala.
Sang Pate se alos pangghaliyan tor penter kasebbhut akherra abhadhi raket dari ghadhebbhung, ban Sang Pottre epakon nete raket jareya. Keyae Poleng adorong raket kasebbhut da’ tengnga saghara sambi apessen, jha’ kalamon dagghi nemmoe kaangelan mangka salerana sangghup abhantoa.
Saellana Sang Pottre kenyot ekeba aros da’ tengnga saghara, Keyae Poleng abali da’ karajaan. Neng dalem parjhalanan ghubhar da’ karajaan, salerana kabhingongan margha ta’ abhakta bhukte jha’ Sang Pottre ongghu-ongghu la mare esedhane mabi peddangnga. Molana salerana lajhu nyanyo’on da’ Guste Alla. Ta’ sabarampa abiddha lajhu dateng settong pate se akanta nyerraaghi aba’na sopaja epate’e. Ta’ kadhik kalaban parasaan mangmang pole Keyae Poleng lajhu matee pate kasebbhut sarta mondhut darana ghuna eatorraghina menangka bhukte jha’ Sang Pottre la ongghu-ongghu esedhane.
Dhineng raket se ngeba Sang Pottre ghella’ teros elanyo’aghi da’ tengnga saghara, ban akherra raket kasebbhut kandhas e pengghir sereng, ban Sang Pottre lajhu nyandarraghi tengngana da’ tompo’anna beddhi paseser. Kennengngan pakandhasan ban panyandaran gheggherra Sang Pottre jadiya akherra esebbhut gheggher, ban sampe sateya esebbhut Dhisa Gheggher.
Neng e kennengngan jadiya padha’aranna Sang Pottre ekarasa sake’ se saja’na akanta se abeberaghina. Serrena e dalam kabhingongan salerana lajhu ngolok Keyae Poleng. Pate se becce’ pangghali tor sakte kasebbhut dhuli rabu. Ta’ abit pole Sang Pottre lajhu abhabharraghi settong bhabhaji lake’ se ropana ganteng manis mara maddhu. Bhabhaji kasebbhut easmae Radhin Saghara. Sang bhaji’ dhaddhi rato tor penter. Molana, kalaban ta’ mangmang pole Keyae Poleng morokkaghi sakabbhinna elmo kasakteanna da’ Radhin Saghara.
Sabbhan are Radhin Saghara amaen neng paseser. Naleka settong are, natkala emo’ amaen, Radhin Saghara katengal olar daduwa’ sarana nyembhurraghi apoy mancar dari colo’na. Radhin Saghara katako’an lajhu buru paleman sarta mator da’ Ebhuna, kalamon bada’ olar. Ebhuna makon sopaja Radhin Saghara dhuli megha’ olar ajaib daduwa ghella’. Kalaban gaga’ bangal Radhin Saghara ajhalannaghi papakonna Ebhuna. Saellana olar daduwa ghella’ epegha’, pas pada aoba dhaddhi tombhak kakabbhi. Kaduwa’ tombhak jareya enyamae Naggala ban Alogara. Tombhak daduwa’ jareya, menorot kaparcajaanna masyarakat Madhura bada’ e astana Pate Cakraningrat.
Saellana rajha Radhin Saghara atanya ka Ebhuna. Sang Ebhu ngotos sopaja’a Radhin Saghara manjheng mongkore Ebhuna addhep da’ temor daja, dhineng Ebhuna ngadhep da’ bara’ lao’. Pajhat ghu-ongghu ajaib. Margha kalaban ta’ e ka-sangka Radhin Saghara so Ebhuna o-tao elang serna akanta se ekebbhet angen. Radhin Saghara nemmoaghi salerana neng e dhisa Nepa, iya jareya settong dhisa se dhunongnga e antara Pamekkasan so Sampang, dhineng Ebhuna ekebbhet angen kantos nandhuk da’ Tase’ Lao’. Sampe’ sateya sabagian masyarakat Madhura ghi’ parcaja, jha’ kalamon bada’ angen se datengnga dari bara’ daja nango nojjhu da’ temor lao’, jareya partandha kalamon Sang Pottra neppa’e asowan da’ Sang Ebhu. Sabhaligga, bila bada angen dateng dari temor lao’ nojjhu da’ bara’ daja, jareya ategghes jha’ Sang Ebhu nyapot Pottrana. Kalamon bada angen kalengbusbus se ararosak, jareya menangka ghalaghaddha Keyae Poleng. Asma Keyae Poleng sanget ekenal dhineng masyarakat Madhura. Salerana banne’ ghun coma’ sakte se bisa apareng partolongan da’ reng-oreng se ambhutoaghi bhai, nangeng jhughan bisa dhuka sarta marosak bila bada hal-hal se korang cocok da pangghaliyanna. Keyae Poleng sanget ehormate sarta etako’e. (ta' kasebbut se ngarang)
Posting Komentar