D.
255. Dhek-andhegghâ tasbhi ; salokana orèng towa sè ella ta’ kowat alalakon, tjoma èkala’ sabâbbhâ bhâi.
256. Doe’-nondoe’ kotjèng ; salokana orèng sè neng-enneng bhâr-masabbhâr èadâ’ânna mosona, nangèng sanjatana njarè akkal sè matjalaka’a mosona.
257. Doe’-nondoe’ mèntè tampar ; padâ artèna bi’ saloka nomer : 404.
258. Dâ-padâ èdhoelâng geddhâng ; padâ artèna bi’ saloka nomer : 400.
259. Dâdâ ghoelâ bâlâkang mèmbhâ ; salokana orèng sè dâ’-adâ’ân bettjè’ bân pabhâlâ, nangèng bilâ mongkor djhoebâ’.
260. Dem-ngeddem kolek ; èkotja’aghi dâ’ orèng sè katonna neng-enneng ( rem-malarem ), nangèng ngennènga.
Dj.
261. Djhâoe ka lontjèng ; sè bâdâ lontjèng rèja kapprana èdâlem kotta, èdhisa tadâ’, dhâddhi orèng dhisa èkotja’ djhâoe ka lontjèng, artèna ta’ tao adhât tata krama bân bhoedhoe.
262. Djhâoe langngè’ bi’ somor ; artèna tadâ’ ra-kèrana sè kadhâddhiâna otabâ mostaèl sè katekkana.
263. Djhâ’ akatja ka orèng, akatja ka palonganna patè’ ; artèna djhâ’ pardoeliân dâ’ tjalèna orèng, tjalèna dhibi’ kodhoe èboeâng.
264. Djhâ’ aghâghâ taboe’na patè’ ; artèna djhâ’ aghâbâj pa-apa, sè kèra bhâdhânna dhibi’ ta’ endâ’ èpatjara djârèja bân orèng laèn.
265. Djhârân èkalèboeri lorana ; salokana orèng, sè marghâ dâri pènterra lalakon, pas èpassraè pangghâbâjân ( lalakon ) bânnja’.
266. Djhârân tjelleng ghoesè ; (èpara’è ngopkop, èdjhâoei ngettè’ ) salokana orèng sè ta’ ghâmpang èkapolong, sabâb bâbâtegghâ soka’ arasanan djhoebâ’na orèng.
267. Djhârân ngakan bâbhoedhânna ; èkotjaa’aghi dâ’ orèng matamoj, sè noro’ ngakan lè’ollèna dhibi’.
268. Djhârân pegghâ’ ghâghalengnga, ampo ngekke’ kodhâlina ;salokana orèng binè’ sè tangodhâ ghâlloe alakè, dhoemèn randhâ ladjhoe ta’ bettjè’ tèngkana.
269. Djhâroem moso bâddhoeng ; salokana orèng doemè’ bân mèskèn, amoso orèng aghoeng, kobâsa bân soghi.
270. Djâ-kadjâ monteng ; èkotja’aghi dâ’ na’-kana’ alalakon otabâ adjhâlân la lesso, sopadjhâ èwat-kowattaghia, marghâ ella para’ napa’a otabâ para’ marèa, dhâddhi soro djâ-kadjâ sakonè’agghi’.
271. Djhoeko’ maso’ ka boeboe ; salokana orèng sè nengnget tjalaka’na dhibi’.
272. Djhoeko’ kènè’ pakanna djhoeko’ radjâ ; parèbhâsanna orèng doemè’ sè èperres lorana, otabâ orèng bhoedhoe èperres orèng pènter.
273. Djhâtè kasosobhân lodjhoeng ; salokana orèng binè’ bhângsa aghoeng noro’ patona orèng bhângsa doemè’.
274. Djhâoe labâddhâ ; parbhâsanna orèng sè ella pa’-napa’ dâ’ man-dimman naghârâ.
275. Djhilâ ta’ atolang ; parbhâsanna orèng sè lât-djâlit otja’na, otabâ orèng otja’na nè-bânnè.
276. Djhoedjhoer matè ngondjhoer ; parbhâsanna dhoennja ; dhoennja rèja kenengnganna orèng ngaddhoe tadjhemma akkal, sapa sè maddjhâ akkalla, tanto apes bân kala, apa polè sè bhoedhoe.
277. Djâ’-ghâdjâ’ patè’ ; salokana orèng aghâdjâ’ân talèbât, sè di-boedina pas dhâddhi tokar.
J.
278. Jâ djhâ’ naktoè ; artèna saodhi “ ijja “, “èngghi “ nangèng djhâ’ maso’aghi ka atèna
Nj.
279. Njandher ka apoj ; parbhâsanna orèng sè ama’-semma’ ka tjalaka’na dhibi’.
280. Njaronèn ; salokana alalakon ( pa-apa ) sè mamolanna kènè’ bit-abit dhâddhi radjâ.
281. Njolè’ mata ; èkotja’aghi dâ’ orèng sè ngalakonè kadjhoebâ’ân èadâ’ânna orèng sè wâdjib noro’ malo.
282. Njabâ’ pèssè è paghâr ; èkotja’aghi dâ’ orèng sè korang ngastètè, otabâ ta’ andi’
283. Njabâ’ tellor è bâtton ; èkotja’aghi dâ’ orèng sè kobatèr, marghâ sana’na bâdâ èdâlem pakèboe, bâng-abângan tjalaka’.
284. Njabâ’ songghâ èterdjhâk dhibi’ ; parbhâsanna orèng sè nemmo tjalaka’ dhibi’, lantaran terro matjalaka’a orèng laèn.
285. Njabbhoer djhângkar ; salokana pardjâdji sè ella ta’ andi’ pangarebbhân ongghâna pangkaddhâ polè, tjoma karè adântè’ amboena bhâi.
286. Njongsang nak-anakanna ; parbhâsanna orèng sè ella para’ ghilâ’â.
Posting Komentar