Puisi Madura Yulistiana Ningsih

DHALEM KARETTEK

Arassa songay ampon malanyo’ careta bula ban dika
Maelop un-dhaunan se gi’ ta’ mekkar daddi kembang
Gi’ ta’ samporna bungana ate
Sabab mella’-pandeng socana dika se akantha bintang
Elang egiba ondhem se ngandheng
Taresnana bula dha’ dika coma cokop dhalem karettek-
Se ta’ sempat esowara’agi
Dika pon jau,
Bula alambay tanang
Nyaksene dika dhalem karemmengngan aeng mata se etandheng sopaja ta’ gaggar
Coma ngaros dhalem ate
Mandaran gi’ badha’a dika atole
Matabar mesem se bakal daddi tambana loka kaelangan

14 Januari 2011



MANOSSA

Sobung manussa se socce
Asre
Berse
Mustahil manussa samporna
Salanjangnga bunga
Tor ta’ ngagunge ena
Manossa ta’ leppas dhari sala ban dusa
Salaen se ampon epele sareng Se Kobasa

14 Januari 2011



SAGARA AENG SOCA EBU

Ebu,
Ce’ terrona abdina alabbus-alangngoy
Dhalem kaderressan aeng soca ajunan se ampon nyepta sagara
Magili tor malanyo’ kasombongan ban kacangkolangan na’ poto

Ebu,
Sajuta dusa
Saebu paksa
Salana tengka
Kalero caca
Ta’ bakal katebbus coma kalaban songkem asta tor pada ajunan

Namung sapaneka, esto ajunan ta’ aoba
Paggun cellep tor asre

Abdina gi’ ta’ porna abadi parao sareng lajar epon, ebu…
Abakta’a ajunan dhari peddina loka
Tor maasada sagara aeng soca ajunan sopaja ta’ ngaler
Mabacca pepe tor ate

Pangestoh, 16 Januari 2011

Yulistiana Ningsih, ekarembi’ neng e kampong Lembana, disa Kombang, Talango (Polo Poterran), Songennep, 06 April 1990. Nyerrat puisi tor cerpen dhalem basa Indonesia tor basa Madura. Mahassiswa Sekolah Tinggi Ilmu Tarbiyah Aqidah Usymuni (STITA) Songennep paneka puisina maso’ dhalem antologi puisi Madura Lanceng Paraban Ganja (Komunitas PELAR, 2010). Aktif neng e UKM. Komunitas PELAR STITA Songennep molae taon 2009.