Angghidhân: M. Hafid Effendy
(Angghuta Pakem
Maddhu Mekkasân)
Manabi na-ngarèna, tor abâli ka jhâman lambâ’. Bhâsa Madhurâ ghi’ koko tor
lumbra èghunaaghi sareng pamènat èpon èngghi panèka mongghu para seppo tor para
ngangodâdhân maghârsarè Madhurâ. Orèng Madhurâ aghâdhuân pamangghi jhâ’ bhâsana
dhibi’ ka’dinto bhâsa èbhu sè ètoronaghi dâri orèng seppo ka na’potona
kaangghuy èghunaaghi kabid kènè’ kantos dhibâsa kalabân tojjhuân malanggheng
tor majhurbhu bhâsana dhibi’.
Manabi alèrè’ dâ’ Kabâdâân Bhâsa Madhurâ. Kabid dhimèn kantos samangkèn
ampon èsaroju’i mènangka bhâsa daèra sè kapèng tello’ rajâna sa Indonèsia
(èbingkengnga Bhâsa Jhâbâ sareng Sondhâ) manabi èdhengngang dâri bânnya’epon sè
aghunaaghi èngghi panèka bânnya’na ra-kèra 15 juta orèng, masyarakat bhâsa
Madhurâ sè aengghun neng polo Madhurâ sareng neng pasèsèr dâjâ sareng tèmor
dâri Jhâbâ Tèmor. Namon dâri 15 Juta kasebbhut ampon tasebbâr dâ’ sèantero,
èantarana bâdâ sè alako berra’ apello konèng neng Sorbhâjâ, Jakarta, Jember,
Bandung, salaèn dâri daera kasebbhut jhughânan bâdâ sè èloar naghârâ manca.
Akadhiâ; Malaysia, tor Arab Saudi,
Mèlana bâdâna Kongrès I Bhâsa Madhurâ sè tapongkor ampon kalampan dâri
tangghâl 15 kantos tangghâl 18 Desember 2008, èkaghaliya sareng Pamarènta Pusat
bhâsa tor Balai Bahasa Sorbhâjâ. kongrès Bhâsa Madhurâ bisa èyakonè syah bâdâna
tor bisa neptepaghi èjhâân sè baku tor sè saè mongghu kamufakadhan. Sè sapanèka
ma’ èngghâl ghadhuwân kurikulum dhibi’ kaangghuy èajhâraghi neng sakolaan
ngabidhi dâri Sekolah Dasar kantos Perguruan tinggi neng daèra sè
dhâddhi èngghunna bârghâ Madhurâ. Sè sapanèka ma’ ta’ ros-terrosan akadhi
samangkèn sè pangajhârân Bhâsa Madhurâ coma 2 jhâm pangajhâran tor nompang dâ’
pangajhârân Bhasa Indonèsia. Pangarep panèka amarghâ sadhâjâ syarat sè kodhu
ècokopè bâdâna kaangghuy ngaollè pangakowân / paneptebbhân bhuru ampon bâdâ
èngghi panèka Bhasa Madhura ghadhuân tata-bhâsa sè èsambhât Pramasastra,
ghâdhuân Kamos sareng ampon ngalampaaghi kongrès bhâsa èngghi panèka Kongrès I
Bhâsa Madhurâ akadhi sè èsebbhut è attas.
Mèlana manabi èmot dâ’ tarèka sè ampon èlampaaghi. Kabâdâân bhâsa Madhurâ
ta’ kèra lontor tor obus dâri sè aghunaaghia. Manabi nalèktèghi kabâdâân
samangkèn, kong-langkong majhuna IPTEK (Ilmu Pengetahuan dan Teknologi)
sè sanget santer nyebbâr tor bâr-nyalabâr dâ’ sèantèro. Nyatana kadhâddhiân
ka’dinto apangghibat dâ’ kabâdâân bhâsa Madhurâ, otamana apangghibât dâ’ para
ngan godâdhân. Akadhiâ sèttong pamangghi sè ampon kalampan. Bânnya’
ngangodâdhân ampon ta’ bisa aghunaaghi bhâsa sè saè è dâlem abu-dhâbu sareng
para seppo otabâ ngadhebbhi sè langkong dhibâsa, bânnya’ na’-kana’ ngangodâdhân
sè ampon rang-rang aghunaaghi bhâsa Madhurâ sè alos (engghi bhunten)
neng sakobhengnga keluarga. Pamangghi sè laèn engghi ka’dinto, ampon
bânnya’ ngangodâdhân neng daèra kotta è polo Madhurâ sè ta’ aghunaaghi bhâsa
Madhurâ sokkla. Aponapa mè’ saka’dinto? Bâdâ sè adhâbu marghâ ghi’ kènè’ neng
èsakobhengnga keluarga, bhâsa sè èghunaaghi èngghi panèka bhâsa
Indonèsia, tor bâdâ sè adhâbu, manabi adon-jandon sakancaan bânnya’ aghunaaghi
bhâsa Indonèsia otabâ bâdâ bhâsa se lumbra kalonta, èngghi panèka bhâsa Gaul.
Kadhâddhiân ka’ dinto ampon aghingsèr dâri taon ka taon.
Bâdâna panalektèghan sè ampon kalampan ajhârbââghi, jhâ’ kabâdâân bhâsa
Madhurâ khosos èpon è daèra kotta ampon bânnya’ lontor. Kabâdâân sè ghi’ neptep
tor eksis èngghi ka’dinto è daèra pardhisaan. Aponapa mè’ saka’dinto?
Marghâ è daèra kotta ka’dinto ampon bânnya’ orèng dâtengan dâri loar daèra
Madhurâ, akadhi dâri daèra jhâbâ otabâ loar jhâbâ. Akadi orèng Madhurâ ollè
raka orèng jhâbâ, otabâ orèng Madhura ollè raji orèng jhâbâ. Mèlana bânnya’ akulturasi
dâri loar, kantos bisa serrèng aghunaaghi bhâsa Indonèsia. Salaèn dâri
kasebbhut jhughânan tabhuktè neng la’-sakolaan dâri SD kantos PERGURUAN
TINGGI. Bânnya’ rèd-mored tor mahasiswa ampon biasa aghunaaghi bhâsa
Indonesia tor bhâsa Inggris kaangghuy abu-dhâbu, mârghâ kadhâddhiân ka’dinto
amuara dâ’ IPTEK(akadhiâ; maso’na Internèt neng situs pardhisaan
otabâ kotta. Ampon bânnya’ ngangodâdhân sè aromasa gèngsi otabâ todus sè
aghunaaghiâ bhâsana dhibi’, ngangodâdhân bânnya’ senneng aghunaaghi bhâsa Manca
otabâ bhâsa Indonesia. Mèlana kadhâddhiân ka’dinto aropaaghi tantangan dâ’
barghâ Madhurâ otamana dâ’ para ghuru, para dosèn, sadhâjâna praktisi, tor dâ’
sè bennang èngghi ka’dinto Pamarènta tamaso’ jhughanan Balai Bhâsa sè ngopènè
sadhâjâna bhâsa neng Indonèsia kalabân pangareb kaangghuy makoko kabâdâân bhâsa
Madhurâ dâri taon ka taon.
Salaèn dâri kasebbhut. Parlo èkaghâli saè, jhâ’ kabâdâân bhâsa Madhurâ è
polo Madhurâ ka’dinto amanca bârna ampon serrèng esambhât bâdâna Dialèk è
bhan-sabbhân kabhupatèn è Madhurâ. Badana dialèk ka’dinto jha’ padhâddhi
pokpara otabâ pa-ponapa sè dhâddhi marowet ka pèkker.Sabâb manabi bhâsa
ka’dinto ta’ amacem bârna bisa èsambhât korang èndha tor korang unik.
Dhâddhi macem barnana pangocabhan otaba cab-ocabahan tep-tep settong bhangsa,
ngajhum bhangsa matombu bhasa.
Pramèla dari ka’dinto, badana pan-saponapan kadhaddhian sè ampon kalampan
tor tabhukte, pangareb ngireng rabataghi, patombu tor palanggheng bhâsa Madhurâ
ka’dinto kantos èbarisaghi dâ’ na’poto kabit kènè’ kantos dhibâsa sopajâ bhâsa
Madhurâ dâri taon ka taon pagghun jhemjhem èghunaaghi tor koko salanjhângnga.
èsalen dari http://pakemmaddhu.blogspot.com/
إرسال تعليق