Sesaat lagi, situs dialihkan ke
http://www.lontarmadura.com
_______________

Saloka Tor Parèbhâsan Madoerâ (7)

9 Feb 2011
M.
255.     Man-èman kolè’na geddhâng ; èkotja’aghi dâ’ pangèmanna orèng sè ta’ saapa.
256.     Mandhâr rampa’a naong, mara bâringin korong ; podjhina orèng towa ka na’ potona, mandhâr dhâddhia orèng aghoeng radjâ, soghi ana’, soghi bhâlâ bân soghi arta.
257.     Mandhâr padâ’â atongket roman ; podjhina orèng towa dâ’ na’ potona, mandhâr sè alakè binè rokona bân landjhânga omor, kongsèa kè’-kakè’ bân nè’-nènè’.
258.     Mandhâr bâdâ’â li’-bâli’na dâdâr ; podjhina orèng sè ngarep dâ’ obâna kabâdâ’ân, sabâb orèng sè ètakdir kobâsa segghoet aghâbâj jâ-sabijâ ( aka-tèngka ) , mon bilâ èlang kakobâsa’anna, bhâkal arassa’aghiâ barâmma sossana ètèta mèskèn.
259.     Mon adjâm ghi’ endâ’â ka djhâgoeng ; pakowadhi orèng sè ta’ endâ’ narèma sasorok, nangèng mon sasorogghâ radjâ, bijâsana pas endâ’ nampanè ; otabâ oreng binè’ pata’ endâ’i ka orèng lakè’, nangèng mon ghi’ endâ’â ngakan               ( narèma’a paberri’na ) ghâmpang ètjapo’ paroboe.
260.     Man bâdâ paè’ dârâna ; artèna man ( ma’an / mandhâr ) landjhâng omorra tor bâdâ ontongnga ; kapprana èkotja’aghi dâ’ na’-kana’.
261.     Matjan ngèrrep kokona ; salokana orèng sè dhoe-mabhoedhoe, sanjatana pènter, otabâ orèng sè ta’ endâ’ nodhoeâghi kakobâsa’anna.
262.     Matjan èkorong ; salokana orèng sè bhângsa èkatako’è orèng, nangèng lantaran sèttong bâb ta’ ngennèng pa-apa, orèng sè bijâsana tako’ èlang tako’na ; dhoersila otabâ bisoehoer radjâ, ekennèng pègâ’, ladjhoe èkarangkèng.
263.     Matjan ngèkkè’ boento’na ; salokana orèng se azina bân ana’na otabâ kompojja dhibi’.
264.     444.   Matjan è rongkangnga djha’ lè’-olè’ ; salokana moso sè neng-enneng, djhâ’ dhâ-ghoedhâ, amè’ njalaka’è.
265.     Matjan kala ka embi’ ; salokana orèng apangkat tèngghi, kala ka bhâbâ parèntana
266.     Mapotèa dângdâng potè, matjellengnga dhâlko’ tjelleng ; èkotja’aghi dâ’ orèng sè
267.     Mara aèng aghili ; salokana dhâna bibi bân baberri’ sè tadâ’ amboena.
268.     Mara aèng èbâddhâi kèrèng ; salokana bhârang sè tjè’ tarapassa, sakeddjhâ’ tadâ’, sakeddjhâ’ tadâ’, tadâ’ bânnja’na.
269.     Mara aèng satengnga ; salokana orèng sè lèboer djhoe-ngadjhoeaghi bhâdhânna dhibi’ ( kapènterranna otabâ kasoghianna, kapprana orèng sè ta’ pènter otabâ sè ta’ soghi ongghoe )
270.     Mara adjâm potè molos ; salokana orèng bine’ sè ta’ roma’mèng ( paratèn ) dâ’ ana’na ; adjâm potè molos kapprana ta’ omes dâ’ boedoe’na.
271.     Mara adjâm kobhirian ; salokana orèng soghi sè ta’ abinè bân ta’ endâ’ tèngèl sakalè.
272.     Mara aèng è pennaj ; èkotja’aghi dâ’ tasè’ sè tadâ’ ombâ’na.
273.     Mara èlmona tanggoek ; èkotja’aghi dâ’ orèng sè ngala’ njamanna dhibi’ bhâi, sossana orèng ta’ èpèkkèrè.
274.     Mara orèng tello’ sakètèng ; parbhâsanna orèng sè tèngkana asor.
275.     Mara orèng ngakan rodjhâk tjengkèr ;parbhâsanna otja’na orèng sè otja’na manès otabâ alos, nangèng mon èkèr-pèkkèr sanjatana bi-njebbi bân arâng-birâng, ( rassana tjengkèr dâ’-adâ’ bâdâ manèssa, djân kaboedi djân paka’ )
276.     Mara orèng akento ‘ ; padâ artèna bân nomer 453.
277.     Mara orèng nabbhoe egghoeng ; salokana orèng sè ta’ ollè alemman mon bender lalakonna, nangèng mon sala ollè papanglon.
278.     Mara orèng nabbhoe tjanang ; salokana orèng sè lem-ngalem bhâdhânna dhibi’.
279.     Mara ola’na nangka ; èkotja’aghi dâ’ orèng binè’ sè ngandjhi’, paennengnga tè’-lettè’an.
280.     Mara olar bidhoedhâk ; èkotja’aghi dâ’ orèng sè pandâ’ radjâ, otabâ salokana orèng sè odi’ dâri bâberri’na orèng laèn.
281.     Mara olar nemmo kata’ ; salokana orèng sè tjè’ bhoengana, marghâ ollè kaontongan. 
282.     Mara ono’ ; èkotja’aghi dâ’ orèng sè talèbât djhoebâ’ robâna.
283.     Mara obhoer kalarè ; salokana orèng sè korang teptep atèna.
284.     464.   Mara tjèlèng tato ; salokana orèng ngamok, sè ella ta’ pardoeli dâ’ sapa bhâi sè èlakonè.
285.     Mara tjèna kaèlangan dhâtjèn ; parbhâsanna orèng sè aseddhiân bân ènger, pèk-ngatjèpèk ta’ ètemmo karoanna.
286.     Mara tjatjopo ( pa’-lopa ) bi’ kodoengnga ; èkotja’aghi dâ’ orèng alakè binè, sè tjotjok sabhârângnga.
287.     Mara kapor bân ghoela ; èkotja’aghi dâ’ orèng kadoewâ, sè saellana sarmo pas ta’ ghellem apèsa sakalè.
288.     Mara tasè’ kaodjhânan ; èkotja’aghi dâ’ na’kana’ sè ta’ njerreb bâbâla’an sakalè.
289.     Mara kobâl èkemmè’è patè’ ; ( kapprana èkontjo’è : tadâ’ pegghâ’na ); èkotja’aghi dâ’ tjatjana orèng sè la njata sala, nangèng mon bâdâ ngotja’, bâdâ bhâi sè èpanangsèla (èpanangkèsa ) otabâ sè èkasaodhâ.
290.     Mara terbhâng Pangèlèn ; sè èkareppaghi orèng Pangèlèn ( Songennep ) sè abhârâng ( alalabâng ) terbhâng ; tjolo’na amonjè, tanangnga nabbhoe, sokona aghoengsèng ter-ketteran. Saloka rèja èkotja’aghi dâ’ orèng sè teppa’na alalakon ( opama nokangè ) sambi aroko’ bân atjatja ngatjètot.
291.     Mara tèmbâ kèrrèng ; èkotja’aghi dâ’ orèng djhâr-adjhârân sè maskè bhâdjheng, nangèng kapènteranna ta’ gellem atambâ.
292.     Mara tjatjèng ngalodoe’ komèrè ; èkotja’aghi dâ’ karep otabâ ro-terroan sè mostaèl katekkana.
293.     Mara tjatjèng kennèng aboe ; èkotja’aghi dâ’ orèng sè posang rè-sarèan san-kassannaghi ( opama njarè tang-otangan, bâkto bhânget bhoeto ka pèssè ) nangèng ta’ ghellem nemmo.
294.     Mara tjatjèng ngèrèt kalontongan ; èkotja’aghi dâ’ orèng sè ngongsè kabellâsan dâ’ orèng aghoeng otabâ dâ’ orèng soghi.
295.     Mara kèkèan ; salokana orèng sè talèbât mossè’.
296.     Mara konjerran ; salokana orèng sè tjattjèl bân parèkas dâ’ sabhârâng lako. Konjerran rèja komèrè sè èlobangè bhoegghigghâ sakonè’, bâi’na èboewâng èghântè’è mènnja’, lobângnga pas ètopoè polè, taboe’na èghângsè, èkaghâbâj panamboena na’-kana’ amaèn tjèrek.
297.     Mara bhândheng rabbet ; salokana orèng sè ararosaghân ( arasanan ) lâ-bhâlâna dhibi’.
298.     Mara boelân kasèjangan ; èkotja’aghi dâ’ kolè’na orèng binè’ sè konèng ngadjoendjoenè.
299.     Mara boelân kembhâr ; salokana orèng alakè binè, sè lakè’ bhâghoes sè binè’ raddhin ; otabâ orèng kadoewâ along-polong padâ raddhinna.
300.     Mara tjakar adjâm ; èkotja’aghi dâ’ orèng sè tolèsanna talèbât djoebâ’.
301.     481.   Mara tjarok Marèngan ; èkotja’aghi dâ’ tjarogghâ orèng sè padâ ta’ rèkrèk boeloena salambâr bhâlâkka’.
302.     Orèng Marèngan rèja lambâ’na kabânnja’an orèng Maladjoe otabâ katoronan Maladjoe, padâ ahli amantja’ ( asilat ) ; lamon atjarok padâ Marènganna somèlèa la padâ ngabbhiâghi, nangèng padâ tadâ’ sè kala’a.
303.     Mara ra-kora ; salokana orèng sè rangrang kalowaran.
304.     Mara tatta’ana roman ; salokana pa-apa sè talèbât bânnja’ bilanganna.
305.     Mara kata’ èsamboer ; èkotja’aghi dâ’ sowara nger-ènger sè pas serep sakalèan. 
306.     Mara ko’ol ; salokana orèng sè segghoet ngallè bengkona.
307.     Mara keppet ; salokana orèng sè kènè’ sakabbhiânna nangèng radjâ pangarana.
308.     Mara kotjèng boellâ’ ; èkotja’aghi dâ’ orèng sè pola tèngkana kasoesoe.
309.     Mara kotjèng ajilât tjokka ; salokana orèng sè ta’ andi’ olat manès sakalè.
310.     Mara kodjhoe’ romboena ; èkotja’aghi dâ’ gârijoengnga tjatja.
311.     Mara konjè’ bân kapor ; salokana orèng sè alakè binè sè talèbât atong.
312.     Mara kotjèng èsandingi dhingdhing ; salokana orèng lalakè’ sè èpapolong bân orèng binè’, bit-abit andi’ kèja pangaterro.
313.     Mara ghâltè’ nemmo padi ; salokana orèng sè nemmo kaontongan, tanto tèngka polana bânnèan bân sabhânna.
314.     Mara kettang atjèrek ; salokana orèng alalakon sè èmo’ bân ènger.
315.     Mara kebbhâ’ èndjhâman ; salokana orèng sè dhoedjân atjatja, tapè tadâ’ lessona
316.     Mara râ’-dherrâ’ bâbinè’ ; salokana orèng sè katonna mara orèng bângalan, nangèng ladjhoe kertjet mon èghettak bân mosona.
317.     Mara dhin-dhâdhin anjar ; salokana poelisi sè ghi’ bhoeroe dhâddhi ghendhâk, bhengngès bân kanèjadjâ’ân.
318.     Mara dhâlko’ nemmo seppat ; parbhâsanna orèng sè pènoddjhoe nemmo kaontongan, bhoenga ella tanto.
319.     Mara tèkos kenneng djebbhâk ; salokana orèng sè ta’ ngennèng aghoeli otabâ ta’ ngennèng astèjar ( èhtèjar ) polè.
320.     Mara tèkos alebbhoe ( maso’ ) ka rongkangnga ; salokana orèng sè abit bâdâ è mantja naghârâ, pas molè ka naghârâna dhibi’.
321.     Mara tèkos tatjabbhoer ; èkotja’aghi dâ’ orèng sè lontès ( kopo kabbhi ) marghâ kaodjhânan.
322.     Mara tèkos èdjhâi’ boeri’na ; salokana orèng sè atokar moso bhâla otabâ tarètanna dhibi’.
323.     Mara tèkos boellâ’ ; èkotja’aghi dâ’ orèng sè lèboer arasanan orèng.
324.     Mara talèna salebbâr ; salokana otja’na orèng sè ta’ kennèng partjadjâ onggoe.
325.     Mara tellorra bârakaj ; salokana orèng bâbinè’, sè rokon, asè, sè alakè binè, nangèng lakèna ta’ rokon bân mattowana.
326.     Mara tellor ghârâng ( kontjang ) ; akanta sowarana rèng binè’ atokar otja’.
327.     Mara talpa’ tana ; èkotja’aghi dâ’ orèng sè mèskèn parana.
328.     Mara tolangnga djhoeko’ kopè; salokana lalakon sè nomboeaghi gariddoe’ bân tokar padhoe.
329.     Martabât lontè ; èkoptja’aghi dâ’ orèng sè segghoet kalowaran malem, nangèng mon sèjang ngètek.
330.     Martabât bhândhil ; salokana dâ’ orèng sè lèboer mènta ka orèng, nangèng ta’ endâ’ ari’-beri’â ka orèng.
331.     Martabât bârâkaj ; salokana orèng lakè’, sè ta’ rokon ka mattowana, nangèng nèser ka binèna. ( padâ bân nomer 504 ).
332.     Mara djhângghirang nemmo taè ; èkotja’aghi dâ’ orèng bânnja’ sè ghântè rebbhoe’ sè ngarebbhoeng pa-apa.
333.     Mara wè-rowè ; salokana orèng sè bânnja’ tjatjana, radjâ kakadjoenna ( sasombhârrâ ), nangèng tadâ’ kanjata’anna.
334.     Mara labâj potè ; salokana orèng sè pantes bân tao apolong bân sakabbhiânna orèng.
335.     Salambân bân ; abâ’ kamondoeran bân laboe sampaj.
336.     515.   Mara lang-bhâlânganna to’ot ; èkotja’aghi dâ’ otja’na orèng sè al-saèl otabâ lat-djâlit.
337.     Mara panassa arè nèmbhârâ’ ; èkotja’aghi dâ’ orèng sè pas ladjhoe dhoeson sakalèan, mangka bhân-sabbhânna sabbhâr.
338.     Mara patè’ kasanga ; salokana orèng bânnja’ padâ atokar ( Mon mosèm bharat kasanga bannja’ patè’ alèng-kalèng, dhâddhi bânnja’ sè atokar ).
339.     Mara patè’ nemmo tolang ; salokana orèng sè dâkka otabâ mellak, pa-apa sè ètemmo otabâ èkaollè èkadhibi’âna bhâi karebbhâ.
340.     Mara pènang èsèbâ’ doewâ ; salokana orèng kadoewâ sè robâ bân dhekdhegghâ padâ, akanta opamana na’kana’ kembhâr.
341.     Mara perro’ sangsang ; salokana parembhâghân otabâ tjatja sè ta’ ro-karoan, dhâddhi padâ artèna bân saloka : “ Ta’ etèmmo kontjo’ bhoengkana “.
342.     Mara dângdâng njottjo’ somangka ; salokana orèng sè ta’ ngongghoeâghi lalakonna.
343.     Mara djhâddjhâlâng nemmo dhâmar ; èkotja’aghi dâ’ orèng bânnja’ sè ghântè rebbhoe’ aghâribbhoeng pa-apa.
344.     Mara djhâddjhâlâng kalowar dâri lobângnga ; èkotja’aghi dâ’ rammèna orèng.
345.     Mara mano’ djhângkèpot ; salokana dâ’ orèng sè dhoedjân atjatja.
346.     Mara mano’ ghântong tjowèt ; salokana dâ’ orèng sè dhoedjân atjatja, kongsè aeddjâman tadâ’ lessona.
347.     Mara sóntólójó ; parbhâsanna orèng sè djhoebâ’ robâna sarta èna.
348.     Mara malèng kèrpènang ; parbhâsanna orèng sè dhoedjân la’-ngala’an andi’na orèng ta’ èpènta ghâlloe.
349.     Mara motak kaodjhânan ; parbhâsanna orèng sè robâna njarènggi, marghâ ta’ katekkan saddjhâna.
350.     Mara motak mèghâ’ bâlâng ; salokana orèng sè ta’ katekkan saddjhâna, sanaddjhân èlla sampè’ astèjarra, sarta njandhâng rogi. ( Motak mon mègâ’ bâlâng bijâsana ollèna bâlângnga pas èkeppè’ ghâlloe, pas njargep polè saènggâna bâlâng sè èkeppè’ boeroe bân sè esargep ta’ èkennèng ).
351.     Mara bârâkaj Panglèghoer ; èkotja’aghi dâ’ lora sè talèbât kerras bân ghendhâk. (è kampong Panglèghoer dhisa Pabhian è tèmorra kotta Songennep ghi’ lambâ’ tja’na bâdâ bârâkaj bhoettongnga, enneng è kenengngan sè berrit / bhoejoe’ Panglèghoer ; kapprana rasan : sapa sè atemmo moso bârâkaj djârèja, mastè sakè’ ; dhâddhi ra-lora sè ghendhâk  èopama’aghi mara bârâkaj Panglèghoer. )
352.     Mara bheddhoek Mandiradâ ; salokana orèng sè kakadjhoen ( sasombhâr ), nangèng kanjata’anna tadâ’ ; tja’na tjarètana bheddhoek Mandiradâ rèja tangtangnga ( taktagghâ ) tjè’ kadjâna nangèng doerdoerra ta’ saapa.
353.     Mara bhelling kaodjhânan ; èkotja’aghi dâ’ orèng sè ta’ mèddhi’ bâboeroeghân otabâ ghir-ghighir.
354.     Mara mandjhilân èbâddhâi pèrèng ; èkotja’aghi dâ’ otja’na orèng sè ta’ teptep.
355.     Mara bâbhoedhoen ghi’ ta’ teddhâs ; salokana parkara sè ghi’ ta’ olè potosan.
356.     Mara bâ-labâ ; èkotja’aghi dâ’ orèng binè’ sè sanaddjhân èntara dâ’emma bhâi ta’ lotjot ngembhân ana’na.
357.     Mara bhângbhângan Legghoeng ; salokana tjatja sè roesoe, nangeng aghâbâj ghellâ’na orèng, ( maksoddhâ di’-andi’na bâbinè’ ). Djhoeko’ bhângbhângan rèja bâtjeng bâoena, nangèng èkadhoedjânè orèng,
358.     Marangkaè kodhi’ ; parbhâsanna orèng sè tao njarètaè orèng sè èboe tèn-atènna ; molana èkotja’aghi bârija, sabâb kodhi’ rèja sara bârangka’anna.
359.     Mèkol ponok ; parbhâsanna orèng sè ollè kasossa’an otabâ kamalaradhânna malolo, nangèng ta’ kabâgian kaontonganna.( padâ artèna bân saloka  no: 224 ).
360.     Mèkol towa’ ala’djân rè’-kèrè’ ; towa’na nompa re’-kere’na boeroe, dhâddhi artèna padâ èlang, tadâ’ karèna sakalè. Saloka rèja padâ bân artèna saloka no ;  121, ( èkotja’aghi dâ’ orèng sè karogian doewâ’ kalè ).
361.     Makapaè djhârân boeroe ; salokana tokang ngaposè sè èkennèng aposè, otabâ orèng dhoedjân tjo-ngotjoan orèng tapè ghi’ kennèng ètjo-kotjo orèng.
362.     Mokka’ bârâna ; parbhâsanna orèng sè ngandhâ’âghi rosèjana orèng laèn.
363.     Mata karandjhâng ; parbhâsanna orèng sè pèdjher terro dâ’ apa sè ètangalè.
364.     Matè obhoer ; èkotja’aghi dâ’ orèng sè ta’ tao dâ’ sana’ bhârâdjhâna, marghâ sè wa-towa la padâ matè, dhâddhi tadâ’ sè dhoe-nodhoewâghi.
365.     Matè ladjoeng ; èkotja’aghi dâ’ orèng sè adjhoewâl sakabbhinna sabâ bân tegghâlla, tambhâ’ bân bhâlananna.
366.     Ma’ ta’ tao kalettegghâ maghi salèkor ; èkotja’aghi dâ’ orèng sè ta’ tao bân ta’ ngartè, djhâ’ abâ’na èrasanè otabâ èkatjatja orèng ( artèna : ma’ ta’ ngartè ka tjatjana orèng ).
367.     Matoro’ tjandhoe ka Sandâna ; èkotja’aghi dâ’ orèng sè martjadjâ’âghi pa-apa dâ’ orèng sè ta’ kennèng èpartjadjâ. Tjarètana ghi’ lambâ’ bâdâ orèng anjama Sandâna, djarèja dhoedjhân ngèsep tjandhoe, pas èpatoro’è tjandhoe, tanto bhâi patoro’an djârèja ta’ kèra èpanneng, sabâb tjandhoe rèja bisa naghi’i, salaènna kèja  larang arghâna, malarat sarèanna bân èlarang pamarènta.
368.     Matoro’ dhâghing sakerra’ ; otja’na mattowa dâ’ manto lakè’na, artèna matoro’ ana’na.
369.     Meddhânga aèng apèsa ; èkotja’aghi dâ’ orèng atarètan otaba ana’ ban orèng towana, artèna : tadâ’ pegghâ’na otabâ tadâ’ pèsana.
370.     Masana mok-amok ghi’ bhoeroe nèttèa kerrès ; salokana orèng sè tè-ngatè ngastètè, saellana katjalaka’an.
371.     Masana orèng katonon bhoeroe aghâbâj somor ; pada artèna bân saloka no: 549.
372.     Maskè badâ è lak-ellaghânna naghâ, mon radjhekkèna, kalowar ; salokana takdir rèja mastè ètemmona, mon ella padjhât bagiânna, mastè èkaandi’.
373.     Ma’ kodi’ tataèn, kolan rarèngghân ; otja’na orèng sè ngapessaghi orèng sè kabânnja’an tatèngkan.
374.     Massa’ boernè ; èkotja’aghi dâ’ pa-apa sè nè-bannèan bârnana ; opama : ka’angka’anna massa’ boernè.
375.     Masè ètombhâk bi’ ghentong ; otja’na oreng se tje’ takerdjhâddhâ, marghâ ngeding berta bâb katjalaka’an.
376.     Mowang abbhâ bâtjeng ; èkotja’aghi dâ’ orèng sè ghoe’-ghangghoe’ njatjaè orèng laèn, marghâ terro ollèa ontong, ta’ kalabân abhândhâ pa-apa.
377.     Mowang bâles ; èkotja’aghi ka orèng sè marè ngakan, pas akopadâng.
378.     Maleppaè mano’ ngabâng ; salokana orèng sè to-nantoaghi kaontonganna, halla ghi’ ta’ karoan djhâ’ èkaollè.
379.     Malè’ kalambhi ; èkotja’aghi dâ’ orèng sè asaddjhâ abhâlighâ lora otabâ ghoestè.
380.     559.   Malang serrat ; salokana orèng sè tjè’ bannèanna tatekkonna bân tan-tarètanna bân lâ-bâlâna.
381.     Mes-lemmes kobâl ; parbhâsanna orèng sè abâsanna masè ghâmpang èparènta, nangèng sanjatana lèja’ ta’-parènta’anna.
382.     Malèng abâla tjètak ; parbhâsanna orèng dhoesa, sè pas abâla terros terrang kasala’anna.
383.     Malèng adoe ; salokana orèng sè lèboer ararosak bhâla tatangghâna.
384.     Malèng atèmpo ; èkotja’aghi orèng sè ngètjo’ kalabân aghoebâng otabâ abâ’bâ’, opamana kemmasan, pangètjo’na tjoma èkala’ atèmpo bhâi.
385.     Mappa’ njembhoerrâghi ; èkotja’aghi dâ’ orèng se pangotja’na jâ-sâbijâ.
386.     565.   Mapotonga pèkolan ; parbhâsanna orèng, sè matoro’a otja’ orèng pengko, ta’ kèra kadâddhian.
387.     Madjit adjhâlanan ; èkotja’aghi dâ’ orèng sè adjhâlanan bi’-dhibi’ân ; semma’ tjalaka’na, ghampâng èkanèjadjâ orèng.
388.     Mèghâ’ djhoeko’ è toboeng ; salokana orèng sè ollè sasaddjhâna, ta’ kalabân njangsara.
389.     Mèghâ’ djhoeko’ ta’ bhoeddhâk tjellot ; salokana orèng sè ollè sasaddjhâna, ta’ kalabân nemmo pakèboe pa-apa.
390.     Mètta’ boeri’ è djhâlan radjâ ( Mètta’ boeri’ tengnga lorong ) ; salokana orèng sè ngandhâ’âghi kadjhoebâ’ânna sana’ bhârâdjhâna, abâ’na dhibi’ tanto noro’ malo.
391.     570.   Mangkolèt akanta kolè’ labâng ; salokana orèng pengko, ta’ gellem atoro’ partènta

0 Pamanggi:

Posting Komentar

Diberdayakan oleh Blogger.