Saloka Tor Parèbhâsan Madoerâ (3)

N.

149.        Na’-ana’an tèmon ; èkotja’aghi dâ’ orèng lakè’ otabâ binè’, ngako ana’ dâ’ na’-kana’ binè’ otabâ lakè’,  nangèng ella sabâdjâ, pas èkalèboeri.

150.        Nandâ bhâtok ; salokana orèng sè lalakonna abhoeroemaèn.

151.        Na’-kana ghi’ dâlem kangkangan ; èkotja’aghi dâ’ na’-kana’ sè ghi’ bâdâ èdâlem tangghoenganna orèng towana.

152.        Noro’ bâng-bhâbâng ( no’-noro bhâbâng ) ; parbhâsanna orèng otabâ na’-kana’, sè noro’ sapola tèngkana orèng, nangèng ta’ ètoro’aghi ka ètongan.

153.        Nèng-konèngnga mondhoe ; èkotja’aghi dâ’ orèng sè raddhin konèng, nangèng ta’ narèk atèna rèng lakè’, sabâb parabâ’ânna kasar, tèngkana gherrâ.                                               

154.        Nè’-kènè’ ta’ korang boelânna ; èkotja’aghi dâ’ orèng sè kènè’ bhâdhânna, nangèng pènter sarta bilet.

155.        Nè’-kènè’na tjabbhi lètè’ ; èkotja’aghi dâ’ orèng sè  katonna kènè’ bân bhoedhoe, nangèng pènter tor kowat.

156.        Nèddhâ’â tamantjo’ ta’ lessa ; èkotja’aghi ka orèng sè talèbât koros, geddhoer bân londoe, ta’ kowat alalakon berrâ’ sakonè’.

157.        Nasè’ è pèrèng ; èkotja’aghi dâ’ lalakon sè ella èkarèna bân èpèkkèr landjhâng ghi’ sabelloenna, èta-èta èpamassa ghi’ ngè-tangè, dhâddhi san èlakonè pas tjè’ njamanna ( tjè’ ladjhirrâ ); otabâ èkotja’aghi dâ’ pa-apa sè èkèra ella bhâkal ètarèma’a, nangèng pas bâdâ alangan, kongsè dhâddhi boeroengnga.

158.        Nasè’ satangonan alettè’è palotan ètem sèttong ( saboetèr ), dhâddhi beddheng kabbhi ; èkotja’aghi dâ’ orèng sè bânnja’, marghâ bâdâ sè djhoebâ’ sèttong, pas èdjhoebâ’âghi kabbhi.

159.        Nalè’è paghâr ; salokana orèng mènta ana’na orèng, otja’ ella todjoe’, karè nantoaghi temmona bhâi.

160.        Nellor adjâm ; èkotja’aghi dâ’ orèng sè katonna èlowar akanta bettjè’, sanjatana èdâlem ta’ patè bettjè’ mara èlowar.

161.        Nellor bâlâng ; èkotja’aghi dâ’ nasè’ sè saparo ella massa’, saparona ghi’ ghâli bân matta ( massa’na ta’ somatta ).

162.        Nolong kalontongan tengnga tasè’ ; parbhâsanna orèng nemmo sangsara bân kamalaradhân.

163.        Napa ta’ tandhoek’ ; èkotja’aghi dâ’ lalakon otabâ karep sè ella èdjhâlânnaghi, nangèng èambhoeâghi sabelloenna marè otabâ tekka.

164.        Napok raè ; salokana orèng sè matodoes orèng è adâ’ânna orèng bânnja’.

165.        Napok ngèndjhâm tanang ; èkotja’aghi dâ’ orèng sè andi’ pangara bettjè’ otabâ djhoebâ’ dâ’ orèng laèn, nangèng ta’ njambhâdhanè dhibi’, ngarsadjâ dâ’ orèng laèn.

166.        Namboe’ bi’ kembhâng, èbâles atjan ; èkotja’aghi dâ’ orèng males djhoebâ’ dâ’ kabettjè’anna orèng.

167.        Nombhâk sadjâng ; èkotja’aghi dâ’ orèng bânnja’ sè aroen-dhoeroen atolong orèng sè kasossa’an bhâb pèssè.

168.        Nombhâk malèng abhâbhâdhoeng ; èbâsa’aghi dâ’ orèng sè ollè kaontongan marghâ sè lè-mellè ollè modâ, otabâ rob-orobhân ollè abhâghoesan parana.

169.        Naghârâ ta’ kapotongan pèkolan ; salokana pamarènta panèka kowat,

170.        Negghoe’ boento’na matjan ; èkotja’aghi orèng sè tjak-njatjak ngalakonè pangghâbâjân sè njalaka’è.

171.        Neggoe’ pong-empong ; èkotja’aghi dâ’ orèng sè nekka’aghi karebbhâ, èettokkaghi nalèka nemmo lân-djhâlân.

172.        Nangès kabâbâna dhâlima ; èkotja’aghi dâ’ orèng binè’ sè tèngèl, maskè bhoeroe marè kapatèan lakèna. Dhâlima rèja pamaka’an rèng asèsèk.

173.        Nongghâ’ semmè ; èkotja’aghi dâ’ orèng sè aghântè djhoeloegghâ rèng towana.

174.        Nompa’ djhârân apadjoengan ; salokana orèng sè talèbât senneng.

175.        Nongghâng ; artèna tès-ngètèssaghi orèng.

Tj.

176.        Tja’-entjèng tjolè’ enneng ; èkotja’aghi dâ’ orèng sè ta’ teptep lalakonna, sakeddjâ’ alako rèja, sakeddjâ’ la alako bânnèan polè.

177.        Tjongtjong adjhâlan, èdhoelit ; èkotja’aghi dâ’ orèng sè teppa’ alalakon ètèngghoe orèng laèn, arassa todoes, pas amboe sè alalakon.

178.        Tjarang èèrèt kontjo’na ; parbhâsanna orèng apangara dâ’ ka orèng binè’, èkala’a manto otabâ èpadhâddhiâ binèna dhibi’, ta’ èpènta ka orèng towana, nangèng na’-kana’na dhibi’ ètjatjaè.

179.        Tjara la-kellana tjètak ; èkotja’aghi ka orèng sè ampo aghellâ’ân otabâ alâ’-gellâ’ orèng sè teppa’na atjatja ; sè èadjhâk atjatja pas korang renna atèna, nangèng èdjâ-kadjâ noro’ aghellâ’ ; dhâddhi rammè rèng ngè-sarèngèan.

180.        Tjara sèsèt la-kèla ; èkotja’aghi ka orèng sè korang mardoeli otabâ korang temmen dâ’ pangghâbâjânna. Otabâ èkotja’aghi dâ’ orèng sè matamoj nèng sakeddjhâ’, ladjhoe amèt molè.

181.        Tjara sondel malem ; èkotja’aghi dâ’ tèngka lako sè djhoebâ’.

182.        Tjangkaro’ bâto ; salokana orèng sè talèbât tjerrè’, ta’ enda’ lowang dhoennjana sakonè’a bhâlâkka’.

183.        Tjek-kotjek ghi’ ta’ boengko’ ; salokana orèng otabâ pa-apa sè talèbât towana.

184.        Tjèlo’na atjar ; èkotja’aghi dâ’ pètotor otabâ bhâng-ombhâng ( ghir-ghighir )  sè ta’ patè èpardoeli.

185.        Tjellengnga padâ bân ondem ; èkotja’aghi dâ’ kolè’na orèng sè tjelleng mara ondèm, otabâ dâ’ lora sè samanè deng-mareddeng, sèpat nemmo salana bhâbâna sakonè’ bhâi pas ghighir mara kèlap nappor.

186.        Tjopana èdjhilât polè ; èkotja’aghi dâ’ bhârâng sè ella èbâghi, èpènta polè dâ’ otja’ sè talottjor, èboeroengaghi.

187.        Tjopa gâggâr katana ta’ kennèng èdjhilât polè ; salokana otja’ sè ella talottjor èpakalowar, mastè ètebtebbhi.

188.        Tjangghâ kalèkè ; salokana randâna orèng sè ella alakè pân-barampân kalè.

189.        Tjangghâ tomang ; salokana orèng katello, sè atjatja tjè’ rapa’na.

190.        Tjeng-bâtjengnga boeri’ ghi’ ètjetto’ kèja ; parbhâsanna pangangghebbâ orèng dâ’ ana’na sanaddjhân djhoebâ’â baramma, ija ghi’ èrabâdhi kèja.

191.        Tjabbhi nangtang lalap ; salokana orèng sè atangtangan mènta tambâi lalakon.

Saloka

1. Saloka Tor Parèbhâsan Madoerâ
2. Saloka Tor Parèbhâsan Madoerâ (1)
3. Saloka Tor Parèbhâsan Madoerâ (2)
4. Saloka Tor Parèbhâsan Madoerâ (3)
5. Saloka Tor Parèbhâsan Madoerâ (4)
6. Saloka Tor Parèbhâsan Madoerâ (5)
7. Saloka Tor Parèbhâsan Madoerâ (6)
8. Saloka Tor Parèbhâsan Madoerâ (7)
9. Saloka Tor Parèbhâsan Madoerâ (8)
10. Saloka Tor Parèbhâsan Madoerâ (9)
11. Saloka Tor Parèbhâsan Madoerâ (Panotop)