Sesaat lagi, situs dialihkan ke
http://www.lontarmadura.com
_______________

Saloka Tor Parèbhâsan Madoerâ (8)

9 Feb 2011
G.
255.     Ghântong perro’ ; èkotja’aghi dâ’ orèng kan-ngakan sè ta’ bhândjhoer ( ka’-angka’ sè ta’ bhandjhoer datengnga ) sabâb sè èkakan djhâ’-sakeddjhâ’ tadâ’.
256.     Ghentang nongngep ; salokana orèng satarètan lakè’ binè’ abhâreng bâktona noro’ patona orèng.
257.     Ghendhâk bârângka ; salokana orèng sombong sè ta’ èntos.
258.     Ghendhâng ètabbhoe saladjâ ; salokana parkara sè tjoma èparèksa saladjâ ; opama sè èdâ’wa malolo, dhinèng saladjâna ta’ èparèksa.
259.     Ghendhâng ta’ èsidâ’ ; salokana orèng sè ta’ patè kowat alalakon marghâ ghi’ ta’ ngakan.
260.     Ghentong njarè tjantèng ; salokana ghoeroe sè njarè morèd.
261.     Ghentong èkarobhoet tjantèng ; salokana orèng towa sè èdjoeng-pondjoeng na’ potona.
262.     Ghentong njello’ ka tjantèng ; salokana orèng towa sè ta-mènta otabâ ngakan dâ’ ana’na.
263.     Ghi’ ta’ tjolpak popok bhâbângnga ; parbhâsanna orèng sè tjè’ ghi’ ngodâna.
264.     Ghi’ ta’ tao njambhât emboe’ ; parbhâsanna orèng sè tjè’ ghi’ kana’na.
265.     Ghi’ ta’ tao asèssè’ : artèna padâ bân no; 581.
266.     Ghi’ ra-mèra ; artèna padâ bân no; 581.
267.     Ghoenong sarè ; èkotja’aghi dâ’ pa-apa sè katon bhâghoes otabâ ana-bârna, njennengngaghi.
268.     Gharaksagghâ dâ’ enna’, ghoerdjhemmanna da’ essa’ ; parbhâsanna tatèngkan-tatèngkan, sè katonna noddjhoe dâ’ enna’ nangèng sanjatana sè èpelleng èdissa’.
269.     Ghâ-raghâ odâng ; salokana orèng sè njarè pa-apa, sè ghi’ ta’ tao èdimma kenengnganna, dhâddhi panjarèna ngaboer.
270.     Ghadhebbhoeng ngadjhâk lotto’ ; salokana orèng djhoebâ’ tèngka polana.
271.     Ghâlija’ ta’ èghalitjek ; èkotja’aghi dâ’ orèng ta’ ètarka arassa ètarka.
272.     Ghâltè’ sengkang èonda ; salokana orèng bhoeroe molaè èdjhâr-adjhâri, saellana towa.
273.     Ghâleddhegghâ mèlor, njatana djikar ; parbhâsanna orèng sè ghoen-maaghoeng, ghi-masoghi sanjatana endjâ’.
B.
274.     Bâk-abâk battja, mandi bâttja ; otja’na orèng sè ta’ asaddjhâ ngalakonana pangghâbâjân ro-saparo otabâ ghoeng-tanghoeng.
275.     Bânnè bherrâssa ètemporraghi ; èkotja’aghi dâ’ orèng sè njarèta’aghi tjarètana orèng laèn.
276.     Bânnè na’-kana’ ghi’ aghoentjoeng ; èkotja’aghi dâ’ orèng sè ella tjokop kapènteranna, kennèng èpadhâddhi wa-towa.
277.     Binèna èdhina djhoer-ngondjhoer ; parbhâsanna orèng sè nellak binèna ( dinèng ) na’-ana’na ghi’ nè’-kènè’.
278.     Bhândheng sabhâlanan èpatada’ rong-kèrong sèttong ; parbhâsanna orèng sabhâroendhoet, mon djhoebâ’ sèttong, sè laèn mèlo todoessa.
279.     Bhântal ombâk, sapo’ angèn ; èkotja’aghi dâ’ orèng sè ngalakonè pangghâbâjân sè talèbât njangsara, alaladjâran san-kassannaghi opamana dhâddhi mattroes.
280.     Bânnja’ tongghâ’ akopèng ; artèna bânnja’ orèng dhem-njèmdhemmè tjatja.
281.     Bânnja’ pardjoeghâ, dâddhi pangèsto ; otja’na orèng ari’-berri’ sakone’, sopadjâ ètarèma’a kalabân senneng bi’ sè èberri’i.
282.     Bhântèng matè bân na’-kana’ ngowan ; salokana orèng kowat ( aghoeng ) kala ka oreng apes ( doemè’ ).
283.     Bherrâs doempa, rangrang abâli takerra ; èkotja’aghi dâ’ bhârâng bellian ( bânnè dhaghangan ) èdjhoewâl, kennèng èmastèjaghi padjhoena korang dâri kabellina.
284.     Bherrâs dhâddhi tadjhin, ta’ kèra abali dhaddhi bherrâs polè ; parbhâsanna pa-apa sè ella karè tomebbhâ kadjhâlânan, ta’ parlo èkakasta polè.
285.     Birâ sapakandhângan otaba bâr-tabârrâ birâ ; salokana orèng asattron, somèlèa sarmo ta’ kennèng sè ta’ tè-ngatèa, karana ta’ kèra salosè ongghoe ; otabâ ras-bârâssâ orèng ghilâ, ta’ gellem tèsnèng ongghoe.
286.     Bârâs ta’ adjhâmo ; salokana orèng pènter ta’ kalabân aghoeroe.
287.     Bhârâng ta’ akongsèn ; èkotja’aghi pa-apa sè ta’ ambhoe belli.
288.     Bing-rambinganna tjèndhi ( sottra ) ; salokana orèng bhângsa sastrèja, sanaddjhân ta’ andi’, ghi’ bâdâ bhâi ngadjhinè.
289.     Bing-rambinganna korra’an ; salokana orèng sè tjè’ towana, sanaddjhân ngalolèa sakalè ghi’ patot èormatè.
290.     Bhoe-robbhoe rotjet ; salokana orèng sè ontong bân moldjâ kaadâ’, apes bân nèspa kaboedi.
291.     Bhoe-robbhoe geddhâng ; èkotja’aghi dâ’ orèng asambhâdjâng sè ta’ tao ka hakikina ( hakèkaddhâ ).
292.     Bali’ atjan ; èkotja’aghi dâ’ orèng kadoewâ sè ngalakonè pangghâbâjân tjoma wâ’-doewâ’ân.
293.     Biloe’ tangkar ; salokana orèng sè tatekkonna tjè’ njalèbâna bân orèng bânnja’.
294.     Bilâ’ baloen tompang tjandhâna ; salokana orèng matè, opama : bâ’na mon pagghoena tatèngkanna sè mara djârèja kanta sè abilâ’ baloen tompang tjandhâna, ta’ kèra nemmo lako.
295.     Bhelloe noro’ asennèn ; salokana orèng sè ro’-noro’ pato, ta’ tao ka maksoddhâ bân toddjhoeânna.
296.     Bhelloe akemmè ka tjètagghâ matjan ; salokana orèng sè asal doemè’, negghoe’ pangkat radjâ, abhâbââghi orèng ghoeng-aghoeng.
297.     Belloe’ abângbâng ; salokana orèng pènter alè’-palè’ otja’, sanaddjhân ella segghoet kalè nemmo parkara, loslos bhâi dari okoman.
298.     Belloe’ aboento’ arè’ ; salokana orèng sè djhândjhina njaman, nangèng bilâ la nekkanana djhândjhina pas alè’-palè’.
299.     Bilis ngaddhoe ghâdjhâ ; èkotja’aghi dâ’ orèng kènè’ ngaddhoe pangradjâ.
300.     Bâdâ è tongka’, bâdâ è dâi ; èkotja’aghi dâ’ orèng sè pèlè kasè otabâ ta’ adhil.
301.     Bâdâ è tèk-entèghân ; salokana pa-apa sè tjè’ ghâmpangnga lalakonna ( palasta’anna ).
302.     Bâdâ èabâs, tadâ’ ètegghoe’ ; otja’na orèng sè tjoma karè andi’.
303.     Bâdâ pakon bâdâ pakan ; parbhâsanna orèng alako mastè ollè opa.
304.     621.   Boeddhâk lètjangnga, ta’ noro’ ngakan nangkana ; salokana orèng alalakon sè tjoma ollè lessona, nangèng ta’ ollè asèl pa-apa.
305.     Bhâdjhâk karama ; èkotja’aghi dâ’ orèng sè djhâm-ngèndjhâm, terros èkala’ ta’ èpabâli polè.
306.     Bâdjâng sakotak ; salokana orèng bhângsa aghoeng moso orèng doemè’, apolong dhâddhi sèttong.
307.     Bâdjâng è kellèr ; salokana orèng odi’ è dhoennja.
308.     Bhibhik èadjhâri alangngoj ; parbhâsanna orèng sè morok orèng ngalakonè pangghâbâjân sè padjhât lalakonna.
309.     Bâbi èdheddhel ka arak ; salokana kalakoan djhoebâ’ atambâ djhoebâ’ polè.
310.     Bibir attas bân bibir bâbâ, ghâmpang akebbi’  ; artèna, tadâ’ malaraddhâ orèng tja’-ngotja’, mamanglo, aghoep-sangghoep bân èn-laènna sè bhângsa otja’.
311.     Bhâbhâtang ngadjhâk matè ; salokana orèng nemmo tjalaka’ sè bâ-ngèbâ lâ-bhâlâna otabâ malèng sè bhât-njambhât kantjana.
312.     Bângal ka tonding, tako’ ka tadjhem ; salokana orèng sè ta’ bângal addhoe adâ’, bângalla tjoma mon ella mongkor dari mosona.
T.

0 Pamanggi:

Posting Komentar

Diberdayakan oleh Blogger.