Sesaat lagi, situs dialihkan ke
http://www.lontarmadura.com
_______________

Saloka Tor Parèbhâsan Madoerâ (4)

9 Feb 2011
R.
193.     Randhâna orèng gerring ; salokana pa-apa sè ghi’ ta’ kennèng ètantoaghi, akanta rep-ngarep partolonganna bhâlâ tatangghâ.
194.     Renghiren patè’ koros ; èkotja’aghi dâ’ orèng sè asèddhiân bân pegghel bhâng-ombhâng
195.     Ri’-saboeri’ ; ekotja’aghi dâ’ orèng sè asobât tjè’ kentella. Saloka parèbhâsan.
196.     Ratjon ègherroengan ; èkotja’aghi dâ’ katjalaka’an otabâ bhâbhâdjâ sè tèbâ’â ella tjè’ para’na.
197.     Rè’-kèrè’ dhâddhi patè’ ; èkotja’aghi dâ’ abiddhâ bâkto, padâ bân kabit orèng ghi’ kana’ kongsè dhâddhi orèng.
198.     Ros-korossa ghâdjhâ ; parbhâsanna orèng sè kobâsâ bân soghi, maskè tja’-otja’an mèskèna, ta’ kèra mèskèn ongghoe.
199.     Ra’-para’ èlong ; èkotja’aghi dâ’ kennengngan sè katonna semma’ nangèng sanjatana ghi’ djhâoe, otabâ lalakon sè abâsanna karè sakonè’ nangèng lamlam ta’ dhoeli kennèng pamarè.
200.     Rèpot ta’ ala-ola ; èkotja’aghi dâ’ orèng sè èmo’ alalakon tadâ’ tebbâssâ.
201.     Ropek saghârâna ; prabhâsanna orèng sè ropek panemmona, pandâ’ pèkkèrra, lekkas anapso otabâ dhoeli nèkat.
202.     Ropek paanabhânna ; èkotja’aghi dâ’ orèng sè ta’ djhâoe padjhâlânna otabâ sabbhâna.
203.     Radjâ ombâ’ bhârât angèn ; artèna dhengngarèn, èkotja’aghi dâ’ pa-apa sè bhoeroe alalakon.
204.     Râdjâ tjètak, korang otek ; parbhâsanna orèng sè gâ’-maanggâ’, nangèng bhoedhoe.
205.     Radjâ okkok ; èkotja’aghi dâ’ pa-apa sè radjâ, nangèng tadâ’ goenana.
206.     Radjâ ghâloedhoek, ta’ kèra radjâ odjânna ; èkotja’aghi ka orèng sè kabânnja’an kakadjhoen ( atattalo, atangtangan ), nangèng kadhâddhianna tadâ’.
207.     Radjâ bâdhoek ; parbhâsanna orèng sè ta’ endâ’ la-ngalaè sakalè ka orèng.
208.     Robbhoe bhâta ; èkotja’aghi dâ’ orèng abhisanan, sè sèttong ana’na doewâ’ padâ lalakè’, sè sèttong doewâ padâ binè’ ètemmo abhâreng. Otabâ èkotja’aghi da’ ghoeli otabâ sowara sè abhâreng, opama pangamogghâ bhâlâ robbhoe bhâta ; soragghâ moso robboe bhâta.
209.     Râ’-berrâ’ ghoelâ ; èkotja’aghi dâ’ orèng sè ghi’ endâ’ loeng-sagoeloeng, nangèng sanjatana ta’ patè tjotjok.
210.     Rebbhâng ta’ èserrop ; artèna saloka rèja, orèng sè seddhi dhâk-mardhik ( dhâs-mardhis ) ta’ ètemmo dhâdhâlânna.
211.     Rengngè’ ngalèng ka kadjoe ; èkotja’aghi dâ’ orèng sè apangrasa èkabhoeto orèng amarghâ bânnja’ pangataoanna, nangèng sanjatana ta’ agoena saapa.
212.     Kaalèngan ( karorobhan ) kadjhâng ; èkotja’aghi dâ’ pa-apa sè ella kasèp. Pèotang sè ella abit, mangka ètaghi ; tanto sè aotang ta’ endâ’ njerra, marghâ sakèng abiddhâ, taker ta’ ènga’ djhâ’ andi’ otang.
213.     Kaattasa tako’ ghâloedhoek, kabâbâ’â tako’ tjatjèng ; èkotja’aghi dâ’ na’kana’ otabâ tamennan sè ta’ gellem radjâ otabâ tènggi, nangèng kernèt ija enjâ’.
214.     Kaonggoelân bâboeloen ; artèna kala boeloe ; èkotja’aghi dâ’ orèng alakè binè, sè lakè’ orèng kènè’ sè binè’ orèng aghoeng ; la mastè sè lakè’ kabhâbâ, amarghâ kala dhârâdjhât ; otabâ èkotja’aghi dâ’ kèbân addhoeân ( sapè, adjâm, djângkrèk, ghemmek ) sè ghândhinganna papak, nangèng olessa otabâ dhekdhegghâ sala sèttong kala.
215.     Kaaddhângan saghârâ ghoenoeng essap pètto’ ; èkotja’aghi dâ’ djhoedhoe mon lakar padjhât djhoedhoena, sanaddjhân kaella’ana saghârâ ghoenoeng essap pètto’ opamana, ta’ boeroeng atèmmo kèja.
216.     Kennèng ètalè’è otja’na ; èkotja’aghi dâ’ orèng sè kennèng èpartjadjâ otja’na.
217.     Kennèng belli doewâ’ sasigâr ; èkotja’aghi dâ’ pa-apa sè raha otabâ èraha’aghi.
218.     Kanta badjâng toenti ; èkotja’aghi dâ’ na’-kana’ sè pedjher kalowar-maso’ ka roma.
219.     Konkonan pasèr ; parbhâsanna orèng èro-soro, sè tadâ’ tondhoeng balina ; akanta pasèr
220.     Kantèan njaman ; èkotja’aghi dâ’ tjatja sè talèbât njaman tor bâdâ èssèna sè kennèng èghi’-ghighi’.
221.     2Kotjèng along-kalong tasbhi ; salokana orèng sè tjè-masottjè ; nangèng ta’ kennèng èpartjadjâ ; lèm-maalèm, nangèng sanjatana malèng.
222.     2Kotjèng èkalèboeri na-kana’ ; èkotja’aghi dâ’ pongghâbâ, sè dâri bhâdjheng bân pènterra, ealèm sarta èangghep ka lorana, nangèng tadâ’ tebbâssa ; pakon bâdâ pakan tadâ’.
223.     Kotjèng aghâdjâ’ bân dâoen ; èkotja’aghi dâ’ lalakon sè ta’ paasèl, opama : orèng lakè’ andi’ pangara dâ’ orèng binè’, somèlèa ella segghoet amaèn mata, nangèng terros ta’ ollè njeddhing kanan.
224.     Kotjèng kala ka tèkos ; salokana lora sè kala aparkara moso bhâbâ parèntana ; ( pandâ’na : sè radjâ kala ka sè kènè’ )
225.     Kettja’ tjolo’ bâtjeng boeri’ ; salokana orèng sè pènter mamanglo, nangèng ta’ èntos dhibi’.
226.     Karobbhoean patè, ta’ mèlo sangkol ; parbhâsanna orèng sè ollè kasossa’an otabâ kamalaradhânna malolo, nangèng ta’ kabâgiân kaontonganna.
227.     Karobbhoean ghoenong ; èkotja’aghi dâ’ orèng sè nemmo kasossa’an radjâ.
228.     Karasagghâ èdijâ, tebbhoegghâ è dissa’ ; èkotja’aghi dâ’ berta sè ta’ tjotjok, opama : sè èberta’aghi bhâkal dhâddhia bâdhâna sè Dhâddhâ’, mangka tèbhâna bislit dâ’ sè Bhâroe.
229.     Kerras ta’ akerrès ; parbhâsanna orèng sè sanaddjân abâsanna akanta orèng bângalan bân kowat, nangèng ta’ èkatako’è orèng, marghâ korang otabâ ta’ alama’ ( ta’ arangkebbhân )
230.     Korang boedjâ attjemma ; èbhasa’aghi dâ’ orèng sè korang adjhar, ta’ tao tata krama.
231.     Karaboe èlang panongghoellâ ; èkotja’aghi dâ’ pa-apa sè kakorangan sala sèttong bâgiânna sè radjâ, pas ta’ paarghâ ; otabâ parbhâsanna pasèmoan sè tadâ’ kapalana.
232.     Kerbhoej koros mènta èsaè’è ; salokana orèng sè ta’ pèlak alalakon, nangèng nangtang mènta berri’i pangghâbâjân. Otabâ orèng sè sanjatana dhoesa, nangèng ta’ tarèma dâ’ potosanna pangadhilan, bekkasanna ladjhoe ollè ponnès sè lebbi berrâ’ okomanna.
233.     Kerbhoej molè ka kandhângnga ; salokana orèng sè abit bâdâ è mantja, pas abâli dâ’ naghârâna.
234.     Kerrès alompa’ pamorra ; salokana orèng sè ngotja’aghi sabhârâng apa sè èkarassa dalem atèna, ta’ kalabân èpèkkèr ghâlloe bhâkal kadhâddhiân.
235.     Karè kalatagghâ ; èkotja’aghi dâ’ orèng sè talèbât koros.
236.     Kakona mara poro ; èkotja’aghi da’ orèng sè tèngka polana ban tèndhâk-tandhoegghâ gerra, ta’ ngaresseppaghi da’ orèng sè ngabâs.
237.     Kadhoek sampèr èèrèt, lakona tadâ’  ; otja’na orèng mamanglo da’ orèng sè dhoedjân akalènjâr gâ’-magâgâ’, nangèng ta’ èntos alako ghâbâj.
238.     Kèddhâng molè ka labheddhâ ;  parbhâsan orèng sè ella abinè kongsè doewâ’ kalè, atellak bhâi, pas abâli polè dâ’ binèna sè asal.
239.     Kotok njarè djhâlâ  ; èkotja’aghi dâ’ kaontongan sè dâteng dhibi’.
240.     Katona tjampaka sabâkoel ; pamodjina orèng dâ’ ana’ potona sè èntara njarè kasap mè’ ollè bânnja’ bellâs otabâ èntar alalamar mè’ ollè katampan kalabân bhâghoes.
241.     Kasasapan tapè ; èkotja’aghi dâ’ orèng lakè’ sè tako’ dâ’ binèna.
242.     Kasombhâ sarè boedina ; èkotja’aghi dâ’ orèng sè sadjân towa sadjân soghi bân sadjân senneng. 
243.     Kasombhâ sarè kaadâ’ ; tabhâligghâ nomor 240.
244.     Kata’ neddhâ sapè ; salokana orèng mèskèn ( doemè’ ) alalaghiân tjara orèng soghi ( aghoeng ), otabâ orèng bhoedhoe aka-tèngka akanta orèng pènter.
245.     Katoronan Lajlatoelkadâr ; èkotja’aghi dâ’ orèng sè ollè kaontongan sè ta’ èkèra bân ta’ èsana dâtengnga.
246.     Kètèran korang djhâbâna ; artèna parbhâsan rèja akanta kètèran korang pakanna, tanto aghâloebhoek, pas londoe ; èkotja’aghi dâ’ orèng amadhât sè teppa’na kataghiân.
247.     Kosambhi matè sasèbâ’ ; èkotja’aghi dâ’ orèng sè eppa’na bhângsa aghoeng, bhâbhoe’na bhângsa asor, otabâ eppa’na orèng doemè’ èbhoena bhângsa aghoeng, otaba bhângsa aghoeng sè noro’ patona orèng doemè’
248.     Kala ta’ madjâr, mennang ta’ ngaot ; otja’na orèng sè djâ-ngadjâ (èsa’-paksa’aghi ) sèttong pangghâbâjân.
249.     Kalowang terro ka dhoerin ; salokana orèng sè ta’ pegghâ’ sakalè pangaterrona, nangèng ta’ ghellem tekka.
250.     248.   Kalontong aèssè maddhoe ; salokana orèng soghi sè ta’ katara, sabâb pangang-ghoejja bân babengkonna ta’ ngatarani djhâ’ soghi.
251.     Kellar mellè ta’ kellar ngangghoej, otabâ sabhârâng modâ larang patot ; parbhâsanna orèng soghi sè ta’ tao ghoej-ngangghoej.
252.     Kellar ngangghoej ta’ kellar mellè, otaba sabhârâng larang modâ patot ; èkotja’aghi dâ’ orèng sè ta’ andi’, nangèng ngangghoejâ apa bhâi patot.
253.     Kapor saghâghâng ; artèna kapor mongghing ghâghâng, èketessaghi ngalto’, ijâ arèja karekka’anna orèng alakè binè, tjè’ bhidhâna bân orèng atarètan otabâ asana’. Orèng asana’ tadâ’ pegghâ’na, rèng alakè binè bâdâ tellagghâ.
254.     Kapas njèllem, bâto ètem ngantang ; salokana apessa bhângsa asal, moldjâ bhângsa asor, dhâddhi tabhâlik bân djhâman lambâ’.
255.     Ko’-markoko’ ègghik ; parbhâsanna orèng sè deng-magendeng, dhoe-maboedhoe, nangèng andi’ kakarebbhân sè radjâ.
256.     Kabânnja’an ghâloedhoek, korang odjhân ; parbhâsanna orèng sè kabânnja’an djhândjhi, nangèng tadâ’ dhâddhina.
257.     Kobâtèr ka rempa’na langngè’ ; èkotja’aghi dâ’ orèng tako’ dâ’ pa-apa sè ta’ parlo èkatako’è.

Dh.
258.     Dhâ’-èddhâ’ soko ; artèna salang eddhâ’ soko ; salokana orèng asomadjâ’ân kalabân samar.
259.     Dhâng-adhâng ta’ rowab ; èkotja’aghi dâ’ lalakon sè tadâ’ ollèna, tjoma ollè lessona bhâi.
260.     Dhoerin amoso tèmon ; èkotja’aghi dâ’ orèng sè soghi otabâ kobâsa aso-mosoan bân orèng mèskèn, tanto sè mèskèn kala.
261.     Dhâddhi beddâ’ djhâmona ; parbhâsanna otja’na orèng bâbinè’ ka lalakè’ sè lèboer ( asè ) ka abâ’na ; somèlèa gherra ( kasar ) ta’ andhâddhiâghi seddhina, la-mala èanggep beddhâ’ bân djhamona, èkaro’om bân èkabâras.
262.     Dhâddhiâ djhâlân, sengka ngalèbâdhi ; otja’na orèng sè la tjè’ bâdjhi’na ka orèng laèn, la ta’ gellem sè pa’-sapa’ana, opama djhâlân ta’ endâ’ ngalèbâdhi.
263.     .Dhâddhiâ rebbhâ ta’ endâ’ ngambhâ ; padâ artèna bân saloka Nomer : 260.
264.     Dhâddhiâ aèng ta’ endâ’ njello’  ; padâ artèna bân saloka Nomer : 260.

0 Pamanggi:

Posting Komentar

Diberdayakan oleh Blogger.