Saloka Tor Parèbhâsan Madoerâ (5)

T.

193.     Taèna djhâ’ bâdâ’â oto’na ètjongkè’ polè ; parbhâsanna orèng sè tjè’ talèbâddhâ tjerrè’, sakèng tako’na sè lowanga di’-andi’na, kongsè tomebbhâ dâ’ nèspa.

194.     Tao mandi ka olo ; èkotja’aghi dâ’ parabân sè dheng-seddhengnga alakè, tao ngator angghoejjâ, marghâ dâri bhârâi.

195.     Tao njèkot ta’ tao adjhâi’ ; parbhâsanna orèng sè tao la-malaè otabâ na-ngarèna pa-apa, nangèng ta’ tao andjhâlânnaghi dhibi’.

196.     Ta’ abherrâs ta’ abherris ; prabhâsanna orèng sè la mèskèn, bhoedhoe, ta’ andi’ sana’ bhârâdjhâ, dhâddhi ta’ èabâs orèng.

197.     Ta’ katompangan djhâroem potong ; otja’na orèng sè ta’ andi’ kaparotangan pa-apa, sanaddjhân nèng sakonè’.

198.     Ta’ èlop salasèna bhâlâkka’ ; èkotja’aghi dâ’ orèng sè kapatèan lakè otabâ binè ghi’ ta’ saapa abiddhâ, ella noro’ patona orèng polè ( alakè otabâ abinè polè ).

199.     Ta’ nemmo boedjâ è bâtton ; èkotja’aghi dâ’ orèng, sè pèdjher ollè bhâng-ombhâng, sanaddjhân benderra, apa polè sala.

200.     Tako’ dâ’ djâng-bâdjânganna dhibi ‘ ; èkotja’aghi dâ’ orèng sè alako sala, marghâ atèna ta’ djhemdjhem, arassa katemmon ka orèng bânnja’.

201.     Ta’ ka bârâ’, ta’ ka tèmor ; èkotja’aghi dâ’ orèng sè ta’ njaladjâ pèkkèrra èdâlem doewa’ bâb.

202.     Ta’ kennèng tegghoe’ ( talè’è ) tjolo’na ; èkotja’aghi dâ’ orèng sè segghoet lètjèk ta’ kennèng èpartjadjâ otja’na.

203.     Ta’ kennèng tegghoe’ boento’na ; parbhâsanna orèng sè ta’ perna è bengkona, dhâddhi orèng laèn sara sè terro atemmoa.

204.     Ta’ kennèng sala saosap ( tarèngghâ’na, tèpona ) ; salokana orèng sè ta’ kennèng salaè sakalè, maskèa sakonè’ tanto andhâddhiaghi seddhina.

205.     Ta’ kennèng èkadhâli’i tjolo’na ; parbhâsanna orèng sè segghoet talottjoran otja’na.

206.     Ta’ tao lèbât èbâbâna bâringin korong ; èkotja’aghi orèng sè ta’ tao adhât tata krama. Baringin korong kenengnganna è kotta ija arèja kenengnganna adhât tata krama, dhâddhi orèng sè ta’ tao èntar ka kotta, tanto korang taona dâ’ ka adhât.

207.     Ta’ tao adjhoengdjhoeng tanang ; artèna ta’ biasa njembhâ, èkotja’aghi dâ’ orèng sè korang adjhâr.

208.     .Ta’  todoes dâ’ djâng-bâdjânganna ; èkotja’aghi dâ’ orèng sè ta’ andi’ todoes, ta’ ngènga’è dâ’ tèngghi mandhâbbhâ bhâdhânna dibi’.

209.     Ta’ bâoe sendoe’, ta’ bâoe tjèntong ; èkotja’aghi dâ’ orèng sè ta’ ngennèng lâ-bhâlâ sakalè.

210.     Ta’ boeroeng dhâddhi boen-aboen ; otja’na orèng ka mosona sè èsoro anot ( atellok ), mon endjâ’ ta’ boeroeng matè.

211.     Ta’ ngèding monjèna eddjhâm ; èkotja’aghi dâ’ orèng sè ta’ tao tata krama.

212.     Ta’ andi’ tjalo’ kottong ; èkotja’aghi dâ’ orèng sè ta’ andi’ pèjadhân sakalè.

213.     Ta’ ka alas ta’ ka bengko ; èkotja’aghi dâ’ orèng sè atèngka pola ta’ karoan è sanèjap kenengngan.

214.     Ta’ njerrep boedjâ attjem ; parbhâsanna orèng sè ta’ meddhâs baboeroeghân.

215.     Ta’ tao tjelleng polo’na ; parbhâsanna orèng sè ta’ teptep ako-bengko otabâ alakè binè.

216.     Ta’ tao ( nemmo ) bâtbâdhân ; salokana orèng sè ta’ tao pa-apa sakèng bhoedhoena.

217.     Ta’ tao alip biddheng ; èkotja’aghi dâ’ orèng sè ta’ tao matja aksara Arab otabâ ngadjhi.

218.     Ta’ lowang djhârango bâng potè ; èkotja’aghi dâ’ orèng sè ta’ lowang bâraghât sakalè mongghoe dâ’ pejara’anna na’-kana’.

219.     Ta’ testes palona pandhi, otabâ ta’ meddhâs tapa’ palona pandhi ; èkotja’aghi dâ’ orèng sè tjè’ teggoena, ta meddhi’ ghâghâman ; otaba èkotja’aghi dâ’ orèng sè ta’ ngèdingngaghi bâboeroeghân.

220.     Ta’ tao adhoelit mangsèn ; èkotja’aghi dâ’ orèng sè ta’ tao nolès.

221.     Tè’-lettè’ ngèrèt rondjhângan ;salokana parkara kènè’ dhâddhi radjâ, otabâ, sè atokar kabidhân na’-kana’, bâ’-lambâ’ pas katowa’an.

222.     Tarata èandjhoeaghi ka romboena ; salokana konkonan sè tadâ’ molè ka lorana.

223.     Tarata èotjol ka alas ; salokana orèng sè arassa senneng otabâ pagghoen è sèttong kenengnganna.

224.     Tèra’, ta’ adhâmar ; salokana orèng sè talèbât pènter.

225.     Ter-ater bilis ; èkotja’aghi dâ’ sè molè mènta ater, nangèng bhâreng orèng sè ngater ghellâ’ molèa, ija mènta ater tor èaterraghi kèja bi’ orèng djârèja.

226.     Tako’ ka monjèna goentor ( ghaloedhoek ) otabâ tako’ ka monjèna makam ; èkotja’aghi dâ’ orèng sè tako’ otabâ kabatèr dâ’ apa bhâi, sè ta’ parlo èkatako’è.

227.     Tako’ èghâgghâri pappa ; parbhâsanna orèng sè tako’ ka bhâng-ombhângnga lorana.

228.     Tèkos katon boento’na ; salokana orèng sè ngako nga-satengnga bâb kasala’anna.

229.     To-koto’ amonjè egghoeng ; èkotja’aghi dâ’ opama : orèng ato’-koto’ ka orèng sè kopok ; èkotja’aghi dâ’ orèng sè andjhâlânnaghi sèttong, tja’na dhibi’ terro lèng-ngalènga, otabâ ta’ sa’-kasa’a, nangèng lantaran polana dhibi’, kabbhi tao otabâ ngèding.

230.     Towa pokpoghân ; èkotja’aghi dâ’ rèng towa sè bhoedhoe ta’ tao morok na’ potona.

231.     Tellor sapatarangan ta’ bèttjè’ kabbhi, bâdâ samboeroeghânna ; èkotja’aghi dâ’ orèng satarètan, apolong emma’ emboe’ ta’ mastè bettjè’ kabbhi, ta’ tanto padâ pentèrra, bâdâ kèja sè djhoebâ’ otabâ bhoedhoe.

232.     Talè kangkang talè tèmbâ ; èkotja’aghi dâ’ tamoj sè èka’-angka’è, karèna èkakan èkèbâ molè. ( paparèghân : èkakan èkèbâ ).

233.     Talè kangkang talè potjok ; èkotja’aghi dâ’ orèng èssèna bèngko sè padâ ètangghoeng kakanna, nangèng ghi’ dhâddhi sè ngètjo’a râng-bhârâng èdjâdijâ. ( paparèghân : èkakan èkètjo’ ).

234.     Tèpès kopèngnga ; èkotja’aghi dâ’ orèng sè lekkas seddhi otabâ sè dhoeli ngala’ dâ’ bâbâdhoel.

235.     Tep-antep pako ; salokana orèng sè ta’ neptebbhi kabâdjibhânna mala tjo-ngotjo lorana.

236.     Tadâ’ alas ta’ bâdâ matjanna ; salokana kampong otabâ dhisa, tanto èdjâdija bâdâ wa-towana.

237.     Tadâ’ topèng bettjè’ kaboedi ; kaprana topèng sadjân kaboedi sadjân karè tjon-lotjonna ; saloka èkotja’aghi dâ’ lora otabâ laènna, ta’ èsak akanta sè èghântè.

238.     Tadâ’ tèmbhângan berrâ’ saladjâ ; èkotja’aghi dâ’ orèng atan-tarètanan sè tè-ghântè ter-ngaterrè, dhâddhi sala sèttonga tadâ’ sè katompangan.

239.     Tadâ’ pandhi andi tjalo’ ; salokana orèng sè tje’ ta’ maso’na ka akkal sè ta’ andi’â bhârâng, sè mastè èkaandi’.

240.     Tadâ’ perro’ topona ; èkotja’aghi dâ’ orèng se tadâ’ pangrasana sakalè.

241.     Tadâ’ padi kèpa’ ètjottjo’ adjâm ; èkotja’aghi dâ’ orèng mon mèskèn, tanto ta’ paarghâ, nangèng bilâ soghi, kabbhi padâ aberri’ hormat.

242.     Tadâ’ bhoentel mosèna ; èkotja’aghi dâ’ orèng sè tadâ’ panarèmana, otabâ dâ’ orèng sè ta’ katompangan kabettjè’an dâri orèng laèn.

243.     Tadâ’ ghentong njello’ ka tjantèng ; èkotja’aghi dâ’ na’-kana’ sè ghi’ ta’ tao njarè kasap, ta’ kèra sè ngènomana orèng towana.

244.     Tadâ’ rèng ghilâ apangrasa ; èkotja’aghi dâ’ orèng djâhât, maskè andi’â dhoesa radjâ, ta’ kèra apangrasa sala sakalè.

245.     Tadâ’ kaber aboedoe’ ladjhing ; èkotja’aghi dâ’ toron otabâ ellèr tanto noplès otabâ badâ mèbissa dâ’ sè noronnaghi.

246.     Tadâ’ ombâ’ tadâ’ angèn ; èkotja’aghi dâ’ pa-apa sè lalakon ta’ kalabân bâdâ marghâna ; opama : tadâ’ ombâ’ tadâ’ angèn nangès.

247.     Tadâ’ kerbhoej kaberrâ’ân tandoe’ ; otja’na orèng sè bânnja’ ana’na, nodhoeâghi djhâ’ ta’ ngersola ( aserroan / ango’-ngo’an  ) sè andi’ ana’ bânnja’.

248.     .Tadjhem ta’ èghângsè ; parbhâsanna orèng pènter, tadjhem pèkkèrra, ta’ kadhik aghoeroe.

249.     Tambi asongko’ dimbrâ ; salokana orèng pènter tor salènter bân barikkèng.

250.     Tabbhoeân sennèn ; salokana orèng sè alako ras-ngèras, opama : tamoj èka’-angka’è, sè makalowar bân sè nolong bâddhâna tamoj djârèja dhibi.

251.     Tabbhoeân ella ètolong atangdhâng ; èkotja’aghi dâ’ kalakoan sè ella kalongsè ( talèbât ).

252.     Tangghâ djhâ’ opaè ; èkotja’aghi dâ’ bâbâdhoel otabâ pètenna, èdingngaghi nangèng djhâ’ partjadjâ.

253.     Tadâ’ apoj ta’ paokos ; èkotja’aghi dâ’ pa-apa sè kadâddhiân, ella mastè bâdâ bertana ( bâdâ asalla ).

254.     Tadâ’  okos ta’ paapoj ; mon bâdâ berta mastè bâdâ sè kadâddhiân.

255.     Tadâ’ aèng aghili ka olo ; èkotja’aghi dâ’ ana’na orèng bettjè’ dâddhi bettjè’, ana’na orèng djhoebâ’ dâddhi djhoebâ’.

256.     Tombhâk osong pa tèn-patèn ; èkotja’aghi dâ’ papastèn, ta’ kèra obhâ gingsèr.

257.     Sanaddjhân ngambânga kapalla ; èkotja’aghi dâ’ orèng sè ta’ korang pa-apa, ladjhoe mèskèn marghâ rojalla.

258.     Sanaddjhân akolè’a bessè ; èkotja’aghi dâ’ orèng tegghoe, ta’ èddhi’ tapa’ palona pandhi, nangèng mon èkaroboet orèng bânnja’, tanto sè remmok.

259.     Sanaddjhân asongodhâ pèjol ; sasombhârrâ orèng dâ’ mosona, nodhoeâghi djhâ’ ta’ kèrès ( ta’ tako’ ) sakalè.

260.     Sarimpi naraka ; èkotja’aghi dâ’ orèng lakè’ tengèl sopadjâ èkalèboeri rèng binè’; orèng èkalèboeri babinè’ tanto senneng, nangèng di-boedina nemmo kasossa’an.

261.     Soroanna mara andjhir ; artèna orèng bânnja’ sè èro-soro andjhâlânnaghi sèttong pakon lir-ghilir.

262.     Sorem arèna ; èkotja’aghi dâ’ kamoljâ’ân sè ongrot, akanta pangradjâ sè ongrot pangobâsana ( kakobâsa’anna ).

263.     Serret bâto’na ; parbhâsanna orèng sè talèbât tjerrè’, ta’ endâ’ ari’-berri’ ka orèng sakalè,

264.     Sakaddhoe’ ra’ra’ ; artèna talèbât bannjâ’.

a.              Sakoko èreng ; èkotja’aghi dâ’ sakonè’na dhoesa otabâ kasala’an.

265.     .Sakoko lampèdjâng ; èkotja’aghi dâ’ pa-apa sè talèbât kènè’ otabâ sakonè’.

266.     Sakontjo’na oboe’ ; padâ artèna bân saloka nomer 336.

267.     Sateppong mèbher ;  padâ artèna bân saloka nomer 336.

268.     Sottra èpakaè’ ka tjarang ; salokana anghoej bhâghoes èangghoej orèng djhoebâ’ robâna, otabâ salokana orèng raddhin dâddhi binèna orèng ngong-bârângngong.

269.     Sot-kosot ( los-ellos )  pa-kapa ladjhoe ètompa’ ; parbhâsanna orèng sè elem-alem, èpalar kennènga ro-soro, otabâ marghâ èkala’a bhârângnga.

270.     Sasat katèbhânan mertjo ; otja’na orèng sè talèbât bhoenga, opama : katamojan ghoestè, ollè ontong radjâ.

271.     Sasat nètè oboe’ salambâr ; otja’na oreng ngabdhi, sè ta’ nemmo èra, sabhârang lakona masè sala’a bhâi, dhâddhi pèkkèrra kobâtèr salandjhângnga.

272.     Salep tardjhâ otaba salep ghoentèng ; èkotja’aghi da’ orèng abhisanan, sè ana’na bâng-sèbângnga lakè’-binè’ èpatemmo abhâreng.

273.     Sapa sè akotak ijâ sè atellor ; èkotja’aghi dâ’ orèng nerghâ’ bâoe kento’ kaadâ’, kapprana ijâ djârèja sè akento’.

274.     Salâg-ghâlâgghâ matjan ta’ kèra ngakan boedoe’na ; artèna, sareng-kerengnga orèng, ta’ kèra teghâ nganèadjâ ana’na. 

275.     Satèndhâk sapettjak ; èkotja’aghi dâ’ semma’ djhâoena orèng asana’ bhârâdjhâ, akanta sapopo bân satarètan ; satèndhâk dâ’ sapopo sapettjak dâ’ tarètan.

276.     Sètan katon ; parbhâsanna orèng sè mamadhoelân, pèdjher dhoe-ngaddhoe, njopprè tokarra orèng.

277.     Sendhâng èapèt pantjoran ; èkotja’aghi dâ’ tarètan katello, panengngana binè’.

278.     Sèk-ressèk odâng ; èkotja’aghi dâ’ orèng sè tjè-masottjè.

279.     So-losso sendoe’ ; èkotja’aghi dâ’ orèng binè’ sè ta’ raddhin, nangèng lotong (èsak, bennes, abâk bersè ).

280.     Sapèkol saso’on ; èkotja’aghi dâ’ katjègghâ kalakoanna orèng lakè’ bân orèng binè’.

281.     Sapo èlang ( pegghâ’ ) sampajja ; salokana orèng sè ta’ rokon.

282.     Songaj matè olona ; salokana orèng binè’, saellana èdhina matè lakèna, ta’ tao njarè kasap dhibi’.

283.     Song-osong lombhoeng ; èkotja’aghi dâ’ orèng ngalakonè pangghâbâyân èkambhoeli, èompama’aghi orèng ngosong lombhoeng.

Saloka

1. Saloka Tor Parèbhâsan Madoerâ
2. Saloka Tor Parèbhâsan Madoerâ (1)
3. Saloka Tor Parèbhâsan Madoerâ (2)
4. Saloka Tor Parèbhâsan Madoerâ (3)
5. Saloka Tor Parèbhâsan Madoerâ (4)
6. Saloka Tor Parèbhâsan Madoerâ (5)
7. Saloka Tor Parèbhâsan Madoerâ (6)
8. Saloka Tor Parèbhâsan Madoerâ (7)
9. Saloka Tor Parèbhâsan Madoerâ (8)
10. Saloka Tor Parèbhâsan Madoerâ (9)
11. Saloka Tor Parèbhâsan Madoerâ (Panotop)