Sesaat lagi, situs dialihkan ke
http://www.lontarmadura.com
_______________

Saloka Tor Parèbhâsan Madoerâ (Panotop)

9 Feb 2011
 TJA’OTJA’ SÈ MALARAT ARTÈNA.

  1. Akanta kabrâ èkakan patè’ ; èkotja’aghi dâ’ orèng raddhin tor bhângsa aghoeng, noro’ patona rèng dumè’ tor djhoebâ’ robâna.
  2. Akanta kabrâ èkakan kotjèng ; èkotja’aghi dâ’ orèng raddhin alakè orèng ta’ tao adhât.
  3. Kennèng belli doewâ’ sasigâr ; èkotja’aghi dâ’ pa-apa sè raha otabâ èraha’aghi.
  4. Taèna djhâ’ bâdâ’â oto’na ètjongkè’ polè ; parbhâsanna orèng sè tjè’ talèbâddhâ tjerrè’, sakèng tako’na sè lowanga di’-andi’na, kongsè tomebbhâ dâ’ nèspa.
  5. Pantjoran èapèt sèdhâng ; parbhâsanna tarètan katello, sè panengnga lalake’.
  6. Mon adjâm ghi’ endâ’â ka djhâgoeng ; pakowadhi orèng sè ta’ endâ’ narèma sasorok, nangèng mon sasorogghâ radjâ, bijâsana pas endâ’ nampanè ; otabâ oreng binè’ pata’ endâ’i ka orèng lakè’, nangèng mon ghi’ endâ’â ngakan ghâmpang ètjapo’ paroboe.  ( panjakèt )
  7. Mara kebbhâ’ èndjhâman ; salokana orèng sè dhoedjân atjatja, tapè tadâ’ lessona.
  8. Mara kèkèan ; salokana orèng sè talèbât mossè’.
  9. Matè ladjoeng ; èkotja’aghi dâ’ orèng sè adjhoewâl sakabbhinna sabâ bân tegghâlla, tambhâ’ bân bhâlananna.
  10. Njabâ’ songghâ èterdjhâk dhibi’ ; parbhâsanna orèng sè nemmo tjalaka’ dhibi’, lantaran terro matjalaka’a orèng laèn. 
  11. Ghâlija’ ta’ èghalitjek ; èkotja’aghi dâ’ orèng ta’ ètarka arassa ètarka.
  12. Ghâleddhegghâ mèlor, njatana djikar ; parbhâsanna orèng sè ghoen-maaghoeng, ghi-masoghi sanjatana endjâ’.
  13. Birâ sapakandhângan otaba bâr-tabârrâ birâ ; salokana orèng asattron, somèlèa sarmo ta’ kennèng sè ta’ tè-ngatèa, karana ta’ kèra salosè ongghoe ; otabâ ras-bârâssâ orèng ghilâ, ta’ gellem tèsnèng ongghoe.
  14. Bâdâ è tèk-entèghân ; salokana pa-apa sè tjè’ ghâmpangnga lalakonna ( palasta’anna ).
  15. Akanta ghâdhebboeng boesso’  ; èkotja’aghi dâ’ orèng sè la tadâ’ pangambriân-na sakalè.
  16. Addhoe pâdâ aèngnga ;  otja’na orèng sè andi’ pangara, sopadjâ ollèa ; mon apangara ana’na Kèjaè, ngarsadjâ Kèjaè soro malala.
  17. Ètjotjo’ doeri djhâlân radjâ ; èkotja’aghi dâ’ orèng sè nemmo tjalaka’ neng è paran.
  18. Napok ngèndjhâm tanang ; èkotja’aghi dâ’ orèng sè andi’ pangara bettjè’ otabâ djhoebâ’ dâ’ orèng laèn, nangèng ta’ njambhâdhanè dhibi’, ngarsadjâ dâ’ orèng laèn.
  19. Radjâ ombâ’ bhârât angèn ; artèna dhengngarèn, èkotja’aghi dâ’ pa-apa sè bhoeroe alalakon.
  20. Kasasapan tapè ; èkotja’aghi dâ’ orèng lakè’ sè tako’ dâ’ binèna.
  21. So-losso sendoe’ ; èkotja’aghi dâ’ orèng binè’ sè ta’ raddhin, nangèng lotong (èsak, bennes, abâk bersè ).
  22. Djhârân ngakan bâbhoedhânna ; èkotjaa’aghi dâ’ orèng matamoj, sè noro’ ngakan lè’ollèna dhibi’.
  23. Matjan èkorong ; salokana orèng sè bhângsa èkatako’è orèng, nangèng lantaran sèttong bâb ta’ ngennèng pa-apa, orèng sè bijâsana tako’ èlang tako’na ; dhoersila otabâ bisoehoer radjâ, ekennèng pègâ’, ladjhoe èkarangkèng.
  24. Djhâtè kasosobhân lodjhoeng ; salokana orèng binè’ bhângsa aghoeng noro’ patona orèng bhângsa doemè’.
  25. Njongsang nak-anakanna ; parbhâsanna orèng sè ella para’ ghilâ’â.
 
Nyo’on sapora, tadha’ terrosanna, 
se arabat tor se nyalen: Syaf Anton Wr/Okara Sastra Madura
 




0 Pamanggi:

Posting Komentar

Diberdayakan oleh Blogger.