Saloka Tor Parèbhâsan Madoerâ (2)

E.

1. Èorap tjampor bhâboer ; èbhâsa’aghi ka otja’na orèng sè ta’ ro-karoan, pan-bârampan parkara ètjampor  dhâddhi sèttong.
2. Èotjol padjoe ; èkotja’aghi pa-apa sè pas ta’ èraksa.
3. Ènten maskè njellemma ka tjellot ta’ kèra sorem ; salokana bhângsa aghoeng, maskè la ta’ andi’ ( malarat ) ghi’ katon bhâi djhâ’ orèng aghoeng.
4. Ènten èbâddhâi tjangkèlongan ; èkotja’aghi dâ’ bhângsa aghoeng sè somèlè boer-njamboer dâ’ orèng dhisâ, nangèng ghi’ katara kaaghoenganna.
5. Èop-raopè taè ; èkotja’aghi dâ’ orèng sè èpabirâng otabâ èpamalo orèng.
6. Èndâ’ ngaè’ ta’ enda’ èkaè’ ; parbhâsanna orèng sè lèboer narèma bâberri’na orèng, tapè ta’ endâ’ adhâna ( asadâka ) sakalè.
7. Ètjangtjang ta’ èallè ; èkotja’aghi dâ’ parabân sè la djhâpkaboel abhâkalan, nangèng abit tadâ’ katantoanna djhâ’ bilâ sè èpantemmoa; otabâ parbhâsanna orèng binè’ sè abhindjhângan bân lakèna, ta’ kadhik ètèbhânè sorat panellak.
8. Ètjotjo’ doeri djhâlân radjâ ; èkotja’aghi dâ’ orèng sè nemmo tjalaka’ neng è paran.
9. Èkennèng tadjhina dibi’ ; èkotja’aghi dâ’ orèng sè matè èkennèng sandjhâtana dhibi’ otabâ èokom sabâb sala atorra.  
10. Èkasorkot ; parbhâsanna orèng sè èsoro alako berrâ’, èanggheb akanta doenor bellian ; padâ bân èkasoko èkatanang.
11. Èkerrèka bi’ koto tomana ; (èkerrèka bi’ aboe tomangnga ); otja’na orèng dâ’ mosona, nodoeâghi djhâ’ ta’ tako’ sanaddjhâna èkarobhoet bân sana’ bharâdjhâna.
12. Èkaghâbâj ghoetto mo-temmo ;otja’na orèng sèpat ètemmo èpaènga’ djhândjhina otabâ ètaghi ghoep-sanggoebbhâ.
13. Èkaghâbâj to-bhoeto ; otja’na orèng sè tjoma kaanggoej kalamon bhoeto.
14. Èkaghâbâj mèntjo ; èkotja’aghi dâ’ orèng sè èkaghâbaj tjo-kotjoan otabâ tja’-otja’an.
15. Èkaghâbâj ngo’-ango’ ; èkotja’aghi dâ’ pa-apa sè bhoeroe karaddhoe mon la tadâ’ pèlèanna polè.
16. Èdhoedhoei lala’ boeta ; èkotja’aghi dâ’ orèng sè ta’ tao alalakon, lebbi dâri sapangarana.
17. 108.   Ètadjhâ’ bângal ; èkotja’aghi dâ’ orèng sè ètadjhâ’ dhâdhâghân, ta’ èbâlâi ghi’ ri’-bari’na otabâ ghi’ adhâ-andhân.
18. Ètemmoa dâlem tjètè, ètemmoa dâlem kontong ; otja’na orèng sè akakadjhoen dâ’ sattrona, maskè èdimma’a bhâi sè atjaroka, ta’ kèra njorot.
19. Ètonton lala’ boeta ; èkotja’aghi dâ’ orèng sè ollè kaontongan radjâ, ollè bâbertan sè tjè’ parlona, tao mamarè lalakon kalabân bhâgoes lebbi ( pondjhoel ) dâri ra’-kèra’anna orèng.
20. Ètator ta’ ataè, ta’ ètator ataè ;parbhâsanna orèng sè ta’ dâteng, mon la karè èjâ-sadijâi, mon ta’ èbâ’-ambâ’i dateng ; otabâ orèng sè aghoeghât orèng, bhâreng èparèksa ghoeghâddhâ, ta’ ngatorè katerrangan pa-apa ; nangèng mon èlowar ta’ rang-korang bitjara.
21. Èkennènga djhoeko’na djhâ’ kongsè ketto aèngnga ; otja’na orèng andi’ pangaro, sè èjâlani kalabân alos, tekka sadjhâna ta’ kalabân bâdâ kaghighirân pa-apa.
22. Ètadjhâ’ èèrèt ; èkotja’aghi dâ’ orèng sè nabâng tjokop, alako ras-ngèras otabâ mèt-ngèmèt bhândhâna.
23. Ètobi’ dissa’ sakè’, etobi’ dijâ sakè’ ; otja’na orèng sè ta’ asaddjhâ norotè sala sèttong, sabâb ghi’ padâ ngennèng bhâlâ.
24. Ètapok kala’ odhengnga ; parbhâsanna orèng sè èparogi doewâ kalè.
25. Ètella’  tobi’aghi ; èkotja’aghi da’ pa-apa sè tjotjok, opama : panganggoej bân orèngnga, orèng raddin sadjân raddin, orèng bhaghoes sadjân bhaghoes,
26. Èsekot dâ’ abâ’na dibi’ ; èkotja’aghi dâ’ orèng sè djoebâ’ sangkana ka orèng laèn, sabâb bhâdhânna dhibi’ ella tao ngalakonè tatèngkan sè èsangka’aghi bhoeroe.
27. Èsosso’a bi’ aboe tomangnga ; èkotja’aghi dâ’ orèng sè bânnja’ otangnga.  Opama aboe tomangnga èssosso’, èdjhoewâl kèja, ghi’ ta’ kèra mendâng èpanjerrâ otangnga.
28. Èsolak mengnga’ ; èkotja’aghi dâ’ orèng sè ta-mènta, maskè la èberri’ nangèng ghi’ korang, djârèja pas terros ta’ èberri’i polè ; otabâ èkotja’aghi ka orèng sè èri’-berri’i, pas èlotlot polè kabbhi.
29. Èsebbhit tadâ’ monjèna, èobbhâr tadâ’ bâoena ; èkotja’aghi dâ’ orèng sè ta’ èpardoeli orèng sakalè, marghâ dari mèskènna.
30. Èlang towa’ èlang tambhoel ; èkotja’aghi dâ’ orèng sè karogiân doewâ’ kalè.
31. Èleddjhoerâ ta’ dhâddhi djharoem potong ; otja’na orèng sè bânnja’ sana’ bhârâdjhâna, nangèng padâ kès-mèskèn ; saopamana di’-andi’na èpapolong pas èleddjoer, ta’ dhâddhi djhâroem satogel lakka’.
32. Èpèghâ’ kaok ( kèok ) ; èkotja’aghi dâ’ pa-apa sè ghântjang kadhâddhiânna ; opama adjâm èpèghâ’ pas terros èsambelli ; sardâdoe bhoeroe dhâddhi pas èpadjhâlân dâ’ paperrangan ; bhoeroe sakè’, terros matè.
33. Èdjhoengdjhoeng èanteppaghi ; èkotja’aghi dâ’ orèng sè èlem-alem, ladjhoe ètjalè masakalèan.
34. Èdjhoeroekkaghi ka djhoeglâng ; salokana orèng sè ètèpo èpaghâgghâr dâ’ katjalaka’an.
35. Emmas kabhendem ; èkotja’aghi dâ’ orèng sè sanjatana pènter, nangèng kapènteranna ta’ dhoeli katon.
36. Èghântong tèngghi, èbendem dâlem ; otja’na orèng sè massraaghi abâ’na, marghâ ella aromasa sala, nadâ okoman apa sè èpattrapaghiâ.
37. Ègheddhoenga bessè ; èkotja’aghi dâ’ papastèn, sè njata ta’ kennèng obhâ ghingsèr.
38. Èghâbâj andhâ ; èkotja’aghi dâ’ orèng sè èkaghâbâj la’-kala’an bân mosona.
39. Èghâbâj mandhi sarana ; èkotja’aghi dâ’ boewâ sè èpolong kaadâ’, marghâ èlla towa, dhinèng sè laèn ghi’ tadâ’ sè towa’a.
40. Èberri’ kembhâng males taè ; èkotja’aghi dâ’ orèng sè èbettjè’è, males djhoebâ’.
41. Èberri’ sakèlan, mènta sadeppa ; èkotja’aghi dâ’ orèng sè tadâ’ tobhoegghâ, tadâ’ panarèmana, tadâ’ legghâna, dakka, angkara.
42. Èberri’i long-ellongan ; èbhâsa’aghi dâ’ orèng ta-mènta sè nemmo songobbhâ sangghoep.
43. Èngghoenna bhândheng èdjhoewâli kèndoej ; parbhâsanna orèng sè ella pentèr, èèdhiri kapènteran, otabâ orèng sè ella soghi èparo-terro kasoghiân.
44. Èmbi’ ngator ghoenong ; èkotja’aghi dâ’ kakareppan sè djhoedjhoel, akanta : orèng doemè’ mèskèn alamar potrana orèng aghoeng soghi.

O.

45. On-so’on bâto ; èkotja’aghi dâ’ pangorèbhân (kawâdjibhân) sè tjè’ sangsarana lakona ; na’-karana’a ollè nasè’ sapèrèng, malaraddhâ sè alako kettjem to’ot.
46. Ondhoer sa’ang dâteng tjabbhi ; parbhâsanna lora sè ghendhâk ngallè, ghântèna aghendhâghân polè ; otabâ binè kerreng ètellak, ollè sè djhâng kerrengan polè.
47. Orèng matè odi’ polè ; èkotja’aghi dâ’ orèng sè abâli moldjâ polè ; pardjâdji leppas, èangkat polè ; otabâ orèng soghi bangkroet, pas soghi polè.
48. Orèng lebbhâk èdjhoewâli pèndâng ; parbhâsanna orèng sè aboeroek otabâ èkandhâi pa-apa sè ella èkataoè.
49. Otang patè njerra patè, otang rassa njerra rassa ; parbhâsanna orèng sè matè’è orèng, ijâ kodhoe nemmo bâbâles patè ; orèng aghâbâj djhoebâ’, ija kodoe nemmo bâbâles djhoebâ’ kèja.
50. Olar ngèntarè kol-tokol ; èkotja’aghi dâ’ orèng sè lèbât è kampongnga sattrona nang-nanang, otabâ ka moso è paperrangan sè atellok.
51. ollè matèl èbâddhoenga ; otja’na orèng sè ollè ta-mènta, mangka pas bâdâ sè mènta polè, lamon ta’ èberri’â.
52. Olar ngèkkè’ boento’na ; èkotja’aghi dâ’ orèng sè azina bân ana’na dhibi’.
53. Olle nobi’ ètella’a ; pada artèna bân No 142.
54. Olle ngamèn, èamèn polè ; artèna ollè mènta ka orèng pas èkala’ orèng polè.
55. Oreng madjângan èdjhoewali kèndoej ; padâ artèna bân tja’-otja’an No. 139.
56. Odjhân tebhâ ka tasè’ ; èkotja’aghi dâ’ bâboeroeghân sè tadâ’ goenana.
 

Saloka

1. Saloka Tor Parèbhâsan Madoerâ
2. Saloka Tor Parèbhâsan Madoerâ (1)
3. Saloka Tor Parèbhâsan Madoerâ (2)
4. Saloka Tor Parèbhâsan Madoerâ (3)
5. Saloka Tor Parèbhâsan Madoerâ (4)
6. Saloka Tor Parèbhâsan Madoerâ (5)
7. Saloka Tor Parèbhâsan Madoerâ (6)
8. Saloka Tor Parèbhâsan Madoerâ (7)
9. Saloka Tor Parèbhâsan Madoerâ (8)
10. Saloka Tor Parèbhâsan Madoerâ (9)
11. Saloka Tor Parèbhâsan Madoerâ (Panotop)